Leikurinn var gríðarlega jafn og báðir markverðir voru í góðu stuði. Bæði lið fengu færi til að komast 2-1 yfir áður en Kórdrengir fundu sigurmarkið í uppbótartímanum. Augljóst var að Davíð Smári, þjálfari Kórdrengja, var ekki að fara að sætta sig við eitt stig. Hann dreif sína menn áfram í leit að sigurmarkinu og gerði skiptingar til að reyna að knýja fram þrjú stig. Það tókst.

Sigurmarkið eftir darraðadans í teignum í uppbótartíma. Fáar klisjur eru þreyttari en "þeir vildu þetta meira".... en mögulega átti hún hreinlega við í kvöld.

Eftir smá hikst í byrjun eru Kórdrengir að fóta sig betur í Lengjudeildinni og þessi úrslit hreinlega gera það að verkum að þeir stimpla sig inn í baráttuna um að enda í topp tveimur. Gróttumenn virðast vera sjálfum sér verstir um þessar mundir og eru að tapa niður góðum stöðum. Eru bara miðlungslið í deildinni miðað við frammistöðuna sagði Ágúst Gylfason eftir leik.

Björn Axel Guðjónsson fékk rosalegt dauðafæri til að koma Gróttu yfir seint í leiknum en Jensen varði í markinu. Átti að gera mun betur og hann fer pirraður á koddann.

Erfiður leikur að dæma, mikilvægið var bersýnilegt. Því miður höndlaði Aðalbjörn leikinn ekki nægilega vel. Mark var dæmt af Gróttu í fyrri hálfleik sem mínir menn í "VAR herberginu" á Langholtsvegi segja að hafi verið þvæla.