SKÝRSLAN: Hamingja í haustlægðinni eftir mikla yfirburði Víkinga
Hvað réði úrslitum?
Víkingar voru miklu betri en Stjörnumenn í sjötíu mínútur í dag og áttu sigurinn sannarlega skilinn. Það var nóg sem gerðist í leiknum, mark skorað fyrir aftan miðju, Halli Björns rotaðist, alvöru októberveður á kafla og sá markahæsti bætti tveimur mörkum við sinn markafjölda.
Bestu leikmenn
1. Nikolaj Hansen
Frábær. Tvö skallamörk og kom sér í fleiri færi. Daninn er funheitur í sumar og fáir sem geta stoppað hann.
2. Atli Barkarson
Tvær frábærar stoðsendingar og heilt yfir flottur leikur. Kristall Máni var einnig mjög góður.
Atvikið
Nokkur atvik í þessum leik en markið fyrir aftan miðju, maður lifandi. Draumamark hjá Oliver Haurits, skot úr miðjuboganum á eigin vallarhelmingi.
Hvað þýða úrslitin?
Stjarnan er áfram fyrir ofan HK og ÍA þar sem öll þrjú lið töpuðu í dag. Víkingur eltir Val eins og skugginn og eiga Víkingar Breiðablik í næsta leik.
Vondur dagur
Enginn einn hjá gestunum sem var eitthvað yfirburða lélegur. Það var samt eins og Hilmar Árni og Þorsteinn Már væru ekki inn á vellinum á löngum köflum þar sem Stjörnumenn komust lítið í boltann.
Dómarinn - 7
Heilt yfir fínt, spjöldin öll réttlætanleg.