SKÝRSLAN: Vandræðalaust hjá Val gegn Keflavík
Hvað réði úrslitum?
Auðvelt að benda á augljósan gæðamun á liðunum. Valsliðið spilaði skynsaman sóknarleik sem byggði á þeirra styrkleikum sem varnarlína Keflavíkur réði ekki við. Heilsteypt og jöfn frammistaða heilt yfir hjá toppliðinu og sanngjarn og verðskuldaður sigur í húsi.
Bestu leikmenn
1. Anna Rakel Pétursdóttir
Skapaði oft mikin usla í og við teig Keflavíkur með góðum fyrirgjöfum. Skoraði gott mark þegar hún var fljót að sjá að Samantha í marki Keflavíkur ætlaði að stela metrum og grípa inn í fyrirgjöf og lét því bara vaða utan af kanti og boltinn söng í netinu eftir viðkomu í Samönthu.
2. Ásdís Karen Halldórsdóttir
Í raun gæti allt Valsliðið verið í þessum reit þar sem liðið var heilt yfir mjög gott. Gefum Ásdísi þetta í dag fyrir 90 góðar mínútur og fyrir að vera ógnandi í leiknum.
Atvikið
Mark Önnu Rakelar utan af kanti bar vott um góðar knattspyrnugáfur og klókindi. Atvik leiksins fyrir mér.
Hvað þýða úrslitin?
Valur heldur í toppsætið og leiðir kapphlaupið við Breiðablik. Keflavík sogast nær fallsæti og er á leið í risaleik gegn Aftureldingu eftir viku,
Vondur dagur
Gunnar Magnús Jónsson var svekktur með sitt lið í kvöld. Úrslitin eru eitt en það er áhyggjuefni fyrir þjálfara ef leikmenn hengja haus í mótlæti. Hef þó ekki áhyggjur af því að liðið rífi sig ekki upp fyrir komandi átök.
Dómarinn - 6
Heilt yfir ágætis leikur hjá Steinari, ég er þó fastur á því að Valur hafi átt að fá víti þegar Samantha nánast kýldi Ásdísi Karen niður í baráttu um boltann sem dregur einkunn mína niður til hans. Svo má vel vera að ég hafi kolrangt fyrir mér í þeim efnum.