Heil og sæl! Hér verður bein textalýsing frá leik Breiðabliks og Stjörnunnar í Pepsi-deild karla. Um er að ræða leik í lokaumferð deildarinnar. Það er heldur betur mikið í húfi í þessum leik. Þetta er hreinn úrslitaleikur um Evrópusæti. Stjörnunni dugir jafntefli. Silfurskeiðin, stuðningshópur Stjörnunnar, hitar upp á Spot í Kópavogi. Dómari í dag er Erlendur Eiríksson málarameistari. Áskell Þór Gíslason og Frosti Viðar Gunnarsson eru aðstoðardómarar og fjórði dómari er Garðar Örn Hinriksson. Kristinn Jónsson, einn besti leikmaður Breiðabliks í sumar, er ekki með í dag þar sem hann tekur út leikbann. Við bíðum eftir staðfestum byrjunarliðum.

Áhorfendur eru farnir að tínast inná Kópavogsvöll. Það er sannkallað haustveður hérna í Kópavoginum í dag. Þessa stundina er verið að gera hljóðprufur í hátalarakerfi vallarins og vottast það hér með að kerfið er í lagi

Góðir lesendur. Hér á Kópavogsvelli er tónlistin farin að óma og morgunljóst að hér á að keyra upp stemminguna fram að leik sem hefst eftir rétt rúmar 50 mínútur. Liðin fara sennilega að detta útá völl í upphitun innan skamms

Hingað í blaðamannaboxið var að koma maður vopnaður yfirfullum bakka af bakkelsi og rjúkandi kaffi á könnu og ég var að enda við að koma úr bakaríi. Lífið er gott.

Jæja fyrstu leikmennirnir mættir útá völl. Blikarnir eru þar fjölmennari en alls eru sex Blikar mættir á móti aðeins einum Stjörnumanni.

Hinn eini sanni Guðjón Guðmunds (Gaupi) er búinn að vera um allt hér á Kópavogsvelli. Afhenti hann Garðari Jóh kassa af pepsi rétt áðan og er núna kominn hingað uppí box að gæða sér á hágæða vínarbrauði. Þvílík yfirferð!

Fyrri leikur þessara liða endaði með 1-1 jafntefli í Garðabænum. Arnar Már Björgvinsson kom Blikum á bragðið en Halldór Orri Björnsson jafnaði metin. Báðir eru þeir í byrjunarliðum liða sinna í dag og sennilega til alls líklegir.

Byrjunarliðin bæði eru farin til búningsherbergja. Aðeins um 10 mínútur í að Erlendur Eiríksson blási til leiks. Stúkan hér á Kópavogsvelli er ört að fyllast og gamla stúkan er mönnuð Silfurskeiðinni.

Shit löggan er mætt! Eins gott að það er dökkt gler hérna í blaðamannastúkunni. Góðir gestir þetta er að bresta á!!

Liðin ganga inná völlinn í tveim fallegum röðum. Með liðunum eru leikmenn úr yngri flokkum Breiðabliks. Áhorfendur láta vel í sér heyra

Blikar byrja með boltann og sækja í átt að Smáranum með léttan andvara í liði með sér

Fyrsta aukaspyrnan fellur Blikum í skaut á miðjum vellinum. Þetta byrjar hressilega!

Fyrsta færi leiksins! Garðar Jóh kassar út háan bolta og Atli Jóh tekur boltann í fyrsta en boltinn fer yfir mark Breiðabliks. Hættulegt!

Þarna sluppu Stjörnumenn vel. Daníel Laxdal sendir slaka þversendingu sem Arnar Már kemst inní við miðjulínu en náði ekki til knattarins aftur sem hefði sennilega skilað honum einum í gegn.

Bæði lið hafa beitt löngum sendingum upp völlinn í miklu mæli - sem hafa ekki skapað mikla hættu hingað til.

Stjörnumenn fá aukaspyrnu um 20 metra frá marki Blika. Halldór Orri gerir sig líklegan.

Aukaspyrna Halldórs Orra fer í varnarvegginn og eiga Stjörnumenn hornspyrnu sem Ingvar Kale grípur næsta auðveldlega

Tómas Óli finnur Rohde í góðu hlaupi en Rohde fær boltann í höndina er hann reynir að koma sér í færi og réttilega dæmd aukaspyrna.

Halldór Orri sendir aukaspyrnu inná teig Blika sem er skölluð fyrir markið þar sem Mark Doninger er réttur maður á réttum stað en nær ekki nægum kraft í skallann og Ingvar Kale ver með sjónvarpsskutlu.

Garðar Jóhannsson tíar upp af 30 metrunum úr aukaspyrnu og hamrar knöttinn í átt að marki Blika en boltinn fer naumlega framhjá. Sannkölluð fallbyssa þessi vinstri fótur hans Garðars!

Mark Doninger með hættulega fyrirgjöf sem varnarmenn Blika rétt koma frá hættusvæðinu og eiga Stjörnumenn hornspyrnu

Stórhætta fyrir framan mark Blika. Boltinn dettur fyrir Kennie Chopart í teignum eftir hornspyrnu en skotið er blokkað af varnarmönnum Blika.

Vægast sagt stórfurðuleg ákvörðun Frosta Viðars aðstoðardómara. Atli Jóh vinnur boltann af varnarmanni Blika í horninu en er dæmdur brotlegur - þarna hefði Atli verið kominn í ákjósanlega stöðu! Stjörnumenn eru að færa sig verulega uppá skaptið

Arnar Már fellur eftir viðskipti við Alexander Scholz varnarmann Stjörnunnar. Virðist sem hann hafi fengið hönd Alexanders í andlitið. Takast þeir kumpánar í hendur.

Tómas Óli Garðarsson á gullfallega sendingu innfyrir á Nicholas Rohde sem er með áætlunarferðir upp hægri vænginn og inná miðjuna. Rohde gerði samt ekki næginlega vel í þetta skiptið og skaut framhjá marki Stjörnunnar

Spennan hérna á Kópavogsvelli er rafmögnuð. Hér er mikið undir og má sjá það berlega á hörkunni í leiknum og tilburðum þjálfara beggja liða.

Hér ætlar allt um koll að keyra!! Ingvar Kale í tómu veseni! Virðist taka niður sóknarmann Stjörnunnar í örvæntafullri tilraun sinni að ná bolta sem hann smjöraði úr höndum sér. Erlendur Eiríksson virtist ekki vel staðsettur og lét leikinn halda áfram. Stjörnumenn æfir og sparkaði Kiddi Lár járngrind af hlaupabrautinni inná völlinn í hamagangnum.

Fyrri hálfleikur hefur verið eldhress og skemmtilegur hér á Kópavogsvelli. Blikar yfir í hálfleik en Stjörnumenn hafa gert atlögur að marki þeirra og má gera að því skónna að potturinn sjóði yfir í síðari hálfleik ef fram heldur sem horfir.

Rafn Andri Haraldsson hefur lokið upphitun og sprettir inní klefa. Mjög líkleg breyting í vændum á Blikum.

Stjörnumenn og Blikar mættir útá völl aftur. Síðari hálfleikur fer senn að hefast!

Hingað var að berast kvörtun í kvörtunarsímann (695-1401) - áhorfandi í gömlu stúkunni blöskraði hreinlega hve sætin þar væru óhrein og neyðist sökum þess að standa og horfa á leikinn.

Atli Jóh með hornspyrnu sem skapar hættu fyrir framan Blikamarkið en skalli Scholz úr markteignum fór yfir markið. Þetta byrjar fjörlega...jújú svo er víst!

2226 áhorfendur eru hér á Kópavogsvelli. Laglegt það

Þórður Steinar með heimskulega tæklingu útá kanti. Bjarni Jóh mættur í boðvanginn urrandi og geltandi. Það kemur ekkert útúr aukaspyrnunni.

Atli Jóh gerir vel og finnur Ellert Hreinsson sem tekur sér góðan tíma í þetta en ógnar svo marki og sleppir hörkuskoti fyrir utan teig sem Ingvar Kale ver vel í marki Blika

Stjörnumenn að liggja vel á Blikum núna í upphafi síðari hálfleiks.

Garðar Jóh finnur Ellert Hreins fyrir framan teiginn. Ellert reynir að klobba Rene Troost en hollendingurinn nær knettinum og bægir hættunni frá

Þetta mark Blika gæti hafa tryggt þeim farseðilinn til Evrópu á vit ævintýra. Tímabilið byrjaði ekki vel hjá Blikunum en góðir lesendur það er hellingur eftir af leiknum og Stjörnumenn hljóta að leggja allt sem þeir eiga í síðustu 30 mínútur mótsins!

Elfar Árni rennir boltanum á Tómas Óla sem færir boltann yfir á hægri fót og ætlar að skrúfa boltann í hornið en Ingvar Jónsson var mættur á svæðið og handsamaði boltann. Skemmtileg pæling hjá Tómasi.

Slagur! Slagur! Slagur!

Ingvar og Ellert eiga í orðaskiptum sem endar á því að Ellert \"skallar\" markvörð Blika. Stundarbrjálæði sem sennilega hefur bundið endahnútinn á Evrópudrauma Garðbæinga. Þetta er orðin ansi brött brekka fyrir Stjörnumenn

Ben Everson er þarna alltof lengi að athafna sig. Blikar komust í 3 v 2 gegn vörn Stjörnunar. Slæm nýting á góðri leikstöðu.

Stjörnumenn eru með alla anga úti eða öllu heldur frammi sem hefur skapað ansi stórar glufur fyrir skyndisóknir Breiðabliks. Ef við fáum mark frá Stjörnunni fljótlega gætum við verið að horfa á dýnamískar lokamínútur.

Mark hjá Stjörnunni - dæmt af vegna rangstöðu Tryggvi Bjarna rís hæst upp í teignum og skallar að marki - boltinn er á leið inn þegar Garðar Jóh virðist koma við boltann og er flaggaður rangstæður. Sennilega réttilega af Áskeli Gíslasyni aðstoðardómara#1.

Lítið eftir af leiknum. Stjörnumenn eiga aukaspyrnu við hornfánann. Halldór Orri gerir sig líklegan til að senda fyrir. Lítil hætta.

Leikurinn hefur fjarað út og einna markverðast skrautleg návígi um víðan völl.

Elfar Árni með fyrirgjöf frá vinstri sem ratar á Ben Everson sem reynir marktilraun á lofti en boltinn fer hátt yfir mark Stjörnunnar.

Áhorfendur Blika eru hreinlega að klára raddböndin hérna á lokamínútunum.

Fjórar mínútur að minnsta kosti í viðbótartíma hér á Kópavogsvelli. Blikar hafa siglt Evrópusætinu heim í Kópavoginn. Virkilega góður endir á tímabili Blika sem byrjaði satt best að segja brösulega.

Blikaliðið fær Standing O frá áhorfendum. Blaðamönnum hér til mikils ama enda skyggni akkurat 0 metrar!

Erlendur Eiríksson flautar til leiksloka og Blikar næla sér í 2.sæti deildarinnar þar sem Fram vann ÍBV á Laugardalsvelli. Það er fagnað dátt hérna.

Góðir gestir - Íslandsmótinu 2012 er lokið! Það er ljóst að það verður fagnað dátt í kvöld í Kópavoginum og Hafnarfirðinum.