Heil og sæl! Velkomin í beina textalýsingu frá leik KR og Keflavíkur í 22. og þar með lokaumferð Pepsi-deildarinnar 2012. Byrjunarliðin eru klár og má sjá hérna sitt hvoru megin við textann. Athygli vekur að Guðmundur Steinarsson er í byrjunarliði Keflavíkur en óttast var að hann hefði jafnvel leikið sinn síðasta leik á ferlinum eftir að hann meiddist á hné í síðasta leik gegn Breiðablik.

Það eru 7 mínútur í leik og það er afar fámennt í stúkunni sem stendur. Vonandi bætist þó aðeins við af áhorfendum. Þóroddur Hjaltalín Jr. mun dæma leikinn og honum til aðstoðar verða Einar Sigurðsson og Bryngeir Valdimarsson. Varadómari er Þórður Már Gylfason og Jón Þór Ágústsson er eftirlitsmaður.

Þetta er byrjað. Keflvíkingar byrja með boltann og sækja í átt að Miklubrautinni. KR-ingar í átt að íþróttahúsinu.

Guðmundur Steinarsson reynir skot utan af vellii. Ágætis skot en Hannes ver vel og heldur boltanum.

Hættuleg sókn hjá KR. Það kemur fyrirgjöf frá vinstri. Emil Atlason fær boltann í teignum og á skot að marki. Mjög gott færi en Ómar Jóhannsson er vel staðsettur og sér við Emil.

Hinum megin á vellinum á Guðmundur Steinarsson hörkuskalla að marki eftir fyrirgjöf frá vinstri. Hannes Þór bjargar KR með sannkallaðri sjónvarpsvörslu.

Ljubicic á tvær skottilraunir í röð en ekkert verður úr þeim.

KR-ingar sækja. Gary Martin á skot úr teignum sem Ómar ver út í teig. Boltinn berst á Atla Sigurjóns sem neglir í nærhornið en Ómar ver með fótunum og boltinn fer aftur fyrir. Ekkert verður úr horninu.

Atli Sigurjónsson reynir viðstöðulaust skot utan teigs. Ómar er í vandræðum með að halda boltanum en Þorsteinn Már er aðeins of seinn til að nýta sér frákastið og Magnús Þór nær að stíga hann út.

Flott sókn hjá Keflavík. Jóhann Birnir brýst upp vinstri kantinn og sendir góðan bolta inn í teiginn. Þar fær Hörður Sveinsson hellings pláss en setur boltann framhjá fjærstönginni.

Tvær hornspyrnu í röð hjá KR. Ómar þarf að blaka þeirri fyrir aftur fyrir og sú seinni virtist stefna beint á kollinn á Gary Martin en hann nær ekki til boltans.

Jóhann Ragnar Benediktsson á hörkuskot rétt framhjá af löngu færi. Boltinn barst til hans eftir hornspyrnu og hann negldi honum að marki, þarna munaði ekki miklu.

Hörður Sveinsson á skalla nokkrum sentimetrum framhjá stönginni á KR-markinu. Það er að lifna yfir gestunum.

Og aftur er skallafæri hjá Keflavík. Í þetta skiptið flikkar Hörður boltanum áfram á Einar Orra sem bíður á fjærstönginni en hittir boltann illa og setur hann afturfyrir úr upplögðu færi.

Frans Elvarsson á frábæra sendingu inn á Hörð Sveinsson sem hleypur inn í teig á milli tveggja varnarmanna. Boltinn dettur fyrir framan Hörð sem hittir ekki á markið úr dauðafæri.

Þorsteinn Már á skot að marki Keflavíkur en það er ekki nógu fast og Ómar ver örugglega.

Þetta hefur verið nokkuð fjörugur leikur. KR-ingar byrjuðu af krafti og voru betra liðið framan af. Keflvíkingar hafa þó verið að sækja í sig veðrið síðasta korterið eða svo og verið líklegri. Það verður fróðlegt að sjá hvernig 10 KR-ingum mun reiða af í síðari hálfleik en Viktor Bjarki fékk að líta rauða spjaldið á lokamínútu fyrri hálfleiksins. Sagan segir að hann hafi spurt dómaratríóið hvort þeir væru þroskaheftir en við heyrðum það að sjálfsögðu ekki alla leið upp í blaðamannastúku og þorum því ekkert að fullyrða um slíkt.

KR-ingar fá aukaspyrnu rétt utan við vítateigslínuna vinstra megin. Brotið var á Þorsteini Má sem var kominn á fulla ferð að marki. Bjarni tekur aukaspyrnuna og pikkar boltanum á Atla sem á fínt skot, rétt yfir markið.

Keflavík fær aukaspyrnu rétt utan teigs. Guðmundur Steinarsson á hörkuskot framhjá veggnum og niður í hægra hornið en Hannes ver glæsilega.

Það er ekki að sjá að KR-ingar séu manni færri. Þeir eru miklu betri hérna.

Dauðafæri hjá KR. Gary Martin rennir boltanum fyrir Atla Sigurjóns sem er mættur einn í teiginn. Hann missir hinsvegar jafnvægið og hrasar áður en hann nær almennilegu skoti og Ómar nær boltanum.

Jóhann Birnir á skot rétt utan teigs. Boltinn fer af varnarmanni og í horn en KR-ingar bægja hættunni frá.

Magnús Sverrir gerir vel og kemst í skotfæri vinstra megin í teignum. Hann lætur vaða en Hannes er vel á verði og ver frá honum. Varnarmenn KR hreinsa frá í kjölfarið.

Gary Martin reynir skot vinstra megin í teignum. Hann sneri á varnarmenn og reyndi að leggja boltann í fjærhornið úr heldur þröngu færi en Ómar ver í horn.

Öruggur KR-sigur í Vesturbænum og KR-ingar ljúka Íslandsmótinu í fjórða sæti. Keflvíkingar sitja hinsvegar áfram í 9. sæti og enda mótið þar.