Verið velkomin í beina textalýsingu af leik Fram og ÍBV. Framarar reyna að bjarga sér frá falli í síðustu umferðinni á meðan ÍBV er að reyna að tryggja sér annað sæti deildarinnar.

Ein breyting er á liðinu hjá ÍBV. Andri Ólafsson kemur inn fyrir Rasmus Christiansen.

Hólmbert Aron Friðjónsson kemur inn í liðið hjá fram fyrir Sam Tillen. Þá kemur Helgi Andrésson á bekkinn fyrir Sveinbjörn Jónasson.

Mikill spenningur fyrir þessa lokaumferð. Ef ÍBV sigrar með tveimur mörkum gegn engu þá þarf Selfoss að vinna ÍA 4-0. Það er allt eða ekkert í dag hjá þessum liðum, ÍBV er líka í baráttu um Evrópusæti, svo þeir slaka ekkert á í dag.

Leikmenn eru komnir út á völl og allt að hefjast hérna í Laugardalnum.

Leikurinn er hafinn!

Almarr Ormarsson kemst í fínt færi, en Abel Dhaira ver í horn.

Hornspyrna hjá Fram. Hólmbert nær skoti, en boltinn fer í hliðarnetið.

Sam Hewson með hörkuskot, sem er nálægt því að fara inn þar sem boltinn hafði viðkomu af varnarmanni!

Christian Steen Olsen með hörkuskot! Ögmundur ver þetta glæsilega í horn!

Það er mest lítið að frétta úr þessum ágæta leik. Eins og staðan er núna þá þarf ÍBV mark, en Fram er í ágætis málum. Jafnt í leik Selfyssinga og Skagamanna.

TRYGGVI GUÐMUNDSSON AÐ SKORA!! Guðmundur Þórarinsson með hornspyrnu sem ratar beint á kollinn á Tryggva, sem skorar!

Hólmbert fer meiddur af velli og inn á kemur Orri Gunnarsson.

Hálfleikur! Fram er nokkuð öruggt í Pepsi-deildinni á næsta ári, Selfoss er að tapa 1-3. ÍBV með þrjú stig í höndum sér, en þetta er ekki búið!

Leikurinn er hafinn að nýju!

SAMUEL HEWSON AÐ SKORA!! Kristinn Ingi skaut á markið, Dhaira varði, en hann fékk frákastið og lagði hann fyrir Hewson sem skoraði örugglega.

Framarar nálægt því að komast yfir!! Orri Gunnarsson skýtur yfir á fjærstönginni

Framarar að spila síðari hálfleik frábærlega, það styttist í mark númer tvö hjá þeim.

Almarr Ormarsson skýtur framhjá þarna í teignum, hann var liggjandi þegar hann tók skotið.

Orri Gunnarsson með skot rétt yfir markið, hann hefur verið duglegur að koma sér í færi.

ALMARR ORMARSSON ÞVÍLÍKT MARK!! Hann spænir sig í gegnum vörn ÍBV og skorar framhjá Abel!!

ÍBV fer í þriðja sætið þar sem Breiðablik er að vinna Stjörnuna.

LEIK LOKIÐ! 2-1 fyrir Fram. ÍBV í þriðja sæti deildarinnar, en Fram í 10. sætinu.