SKÝRSLAN: FH ósigraðir á Miðvelli
Hvað réði úrslitum?
Vallaraðstæður voru ekki boðlegar og leikurinn bauð ekki upp á áferðarfallega knattspyrnu. Mikið um langa bolta og klafs. Tvö mörk Kjartans Henry gegn sínum gömlu félögum spila stóran þátt í þessum úrslitum.
Bestu leikmenn
1. Kjartan Henry Finnbogason
Tvö mörk og fyrra markið strax á annarri mínútu. Erfitt að líta framhjá KHF í dag.
2. Sindri Kristinn Ólafsson
Átti stórgóðan leik í marki FH og gárungar segja að um sé að ræða besta leik hans í FH búningnum til þessa.
Atvikið
Fyrsta mark FH án nokkurs vafa. Vuk Oskar skallar boltann inn í teiginn og þar er Kjartan Henry staddur í D-boganum og tekur bakfallspyrnu og boltinn sveif í loftinu yfir Simen í markinu. Frábært mark
Hvað þýða úrslitin?
FH er eins og staðan er þegar þetta er skrifað í 2 sæti deildarinnar en önnur lið eiga leik til góða, þeir leikir eru í gangi eða fara fram í dag.
KR eru hinsvegar í 8. sæti deildarinnar og hafa tapað síðustu tveimur leikjum sínum 3 - 0 sem er áhyggjuefni fyrir þjálfarateymi KR.
Vondur dagur
Simen Kjellevold markmaður KR átti arfaslakan leik. Staðsetningar hans í tveimur mörkum FH er eitthvað sem gerir það að verkum að FH skorar. Þriðja markið er svo bolti sem hann missir frá sér og Kjartan Henry lúrir þar sem hann á að lúra til þess að skora.
Dómarinn - 9
Virkilega flottur leikur hjá Helga Mikael. Hef ekkert út á hann að setja þannig lagað.