SKÝRSLAN: Víkingar leika eftir magnað afrek Blika frá því í fyrra
Hvað réði úrslitum?
Ef það er eitthvað sem Víkingar kunna þessa dagana, þá er það að vinna fótboltaleiki. Það er ekki auðveld áskorun að fara inn í Kórinn - það er öðruvísi - en Víkingarnir stóðust þá áskorun. Þeir voru frábærir í fyrri hálfleik og áttu að skora mun fleiri mörk. Þetta varð smá hark í seinni hálfleik en það er óhætt að segja að sigurinn hafi verið sanngjarn.
Bestu leikmenn
1. Pablo Punyed (Víkingur R.)
Frábær á miðsvæðinu, gæðastjórinn þar. Með frábærar sendingar og lagði upp seinna markið fyrir Nikolaj. Hann er svo mikill sigurvegari og drífur liðið áfram.
2. Arnar Freyr Ólafsson (HK)
Var mjög svo góður í markinu hjá HK og hélt þeim inn í leiknum í fyrri hálfleiknum. Mjög góður leikur hjá Arnari og ekkert við hann að sakast.
Atvikið
Mér fannst það rauða spjaldið á Karl Friðleif - sem var réttur dómur - og mark HK sem kom í kjölfarið. Nýliðarnir pressuðu vel á toppliðið en Víkingar sýndu styrk sinn í því að sigla sigrinum heim.
Hvað þýða úrslitin?
Víkingar eru búnir að vinna fyrstu átta leikina og þannig leika eftir afrek Breiðabliks frá því í fyrra. Blikar unnu fyrstu átta leiki sína og töpuðu fyrstu stigunum í níundu umferð. Verða Víkingar Íslandsmeistarar líka og Blikar urðu þá?
Vondur dagur
Karl Friðleifur Gunnarsson fékk rautt spjald fyrir ansi vonda tæklingu en ég ætla aðallega að skrá þetta á Ívar Orra Gissurason sem kom inn á og spilaði um það bil þrjár mínútur. Hann meiddist og þurfti að fara af velli í hálfleik. Vonandi eru meiðslin ekki alvarleg en ég trúi því að það hafi verið mjög erfitt að koma inn á í svona stuttan tíma.
Dómarinn - 5
Sko... Mér fannst Logi Tómasson frekar heppinn að fá ekki rautt spjald snemma í seinni hálfleik þegar hann braut tvisvar af sér í sömu sókn. Það gerist ekki oft að menn fá þannig rauð spjöld en þarna hefði það verið verðskuldað að mínu mati. HK-ingar voru ósáttir við markið sem Nikolaj Hansen skoraði og aðrar hornspyrnur en það hefði held ég verið mjög mjúkt að dæma brot á því tilviki - rétt að dæma ekki. Rauða spjaldið á Karl Friðleif var hárrétt - gróf tækling - en Elías átti að mínu mati þá að vera búinn að stoppa leikinn og dæma brot á HK sem kom stuttu áður. HK vildi fá vítaspyrnu undir lokin þegar Örvar féll í teignum en ég held að það hafi verið rétt að dæma ekki á það. Nokkrar stórar ákvarðanir í þessum leik og Elías var með nokkrar réttar en klikkaði líka. Hefði getað verið með meiri stjórn á leiknum á köflum í seinni hálfleik þegar mikill hiti skapaðist. Þetta var erfiður leikur að dæma.