Þetta er búið. Fram vinnur frábæran 4 - 1 sigur. Viðtöl og skýrsla seinna í kvöld.

Þremur mínútum bætt við.

Daníel Gylfason braut á Guðmundi Magnússyni á miðjum vallarhelmingi Keflavíkur. Hann sleppur þó við spjald.

Áhorfendur í Úlfarsárdalnum eru 632.

Gummi Magg með skalla eftir fyrirgjöf Tiago en Mathias Rosenörn varði frá honum.

Tiago með skot að marki sem fór yfir markið. Frömurum fannst Jóhann Þór Arnarson fara aftan í hann en Guðgeir dæmdi ekkert.

Gummi Magg og Magnús Þórðarson eru klárir að koma inná næst egar leikur stöðvast.

Stefan Ljubicic með skot að marki Fram en rétt framhjá.

Tiago brýtur á Sindra Þór í teignum, réttilega dæmd vítaspyrna.

Þórir í góðu færi en renndi boltanum á markvörðinn. Skömmu áður braut Gunnlaugur Fannar illa á Tryggva Snæ út við hliðarlínu en Guðgeir bara sá það ekki. Þarna átti rautt spjald líklega að fara á loft, seinna gula.

Við skiptinguna þreföldu var Frans færður úr miðverðinum upp á miðju. Hann hefur verið besti leikmaður Keflavíkur í leiknum og spurning hvernig þessi breyting hefur áhrif á liðið.

Tryggvi í góðu færi í teignum eftir góðan undirbúning Arons Jóhannssonar en boltinn fer í horn sem ekkert kom út úr.

Stundarfjórðungur liðinn af seinni hálfleik og hann er stórskemmtilegur, allt annað en fyrri hálfleikurinn. Allt spil Fram snýst um tilþrif Fred og samvinnu hans við Tiago. Þegar þeir eru að leika sér saman, þá er gaman.

Siggi Raggi svarar seinna markinu umsifalaust með þrefaldri skiptingu. Skiljanlega því það hefur bara verið eitt lið á vellinum í seinni hálfleik.

Gunnlaugur Fannar braut á Tiago út við hliðarlínu en sleppur við seinna gula spjaldið.

Fred með sendingu út á hægri á Tiago sem lék á varnarman í teignum og skaut að marki en Mathias Rosenörn varði frá honum.

Seinni hálfleikur er hafinn. Engar breytingar á liðunum.

Guðgeir hefur flautað til hálfleiks. Lengi framan af var þetta afar dauft og hægt tempó í þessum leik. Það hefur þó aukist lífið síðustu mínúturnar og markið frábæra hjá Fred gaf okkur góð fyrirheit fyrir seinni hálfleikinn.

Tveimur mínútum bætt við fyrri hálfleikinn.

Jordan Smylie að sleppa í gegn, kom innn í teiginn hægra meginn en skotið hans út í bláinn framhjá. Mjög dapurt.

Már með skot í varnarmann og framhjá en Guðgeir dómari sá ekki að boltinn fór í varnarmann svo Keflavík fékk markspyrnu.

Frans Elvarsson með skalla rétt framhjá marki Framara.

Tryggvi að leika sér að eldinu, braut á Jordan Smylie, nokkuð fyrir utan vítateig en sleppur við seinna spjaldið.

Þórir með hættulega fyrirgjöf inn í teiginn sem Frans nær að skalla yfir markið.

Framarar eru að reyna að komast inn í vítateiginn en Frans Elvarsson miðvörður Keflavíkur er búinn að loka fyrir og í tvígang búinn að stöðva tilraunir þeirra.

Sindri Þór með skot fyrir utan teig sem fór svo hátt yfir að boltinn er ennþá á leiðinni að blokkalengjunni í Grafarholtinu.

Brynjar Gauti skallaði af stuttu færi eftir fyrirgjöf frá vinstri en Mathias Rosenörn náði að slá boltann í burtu.

Það er að komast líf í þetta, Hlynur Atli skallaði að marki í teignum en náði ekki alla leið.

Fyrsta alvöru færið komið, Marley Blair með góðan bolta þvert fyrir markið, Sindri Þór í dauðafæri en missti af boltanum sem fór út fyrir völlinn.

Fyrsti stundarfjórðungurinn er ansi rólegur, lítið að gerast nálægt teigum liðanna og ekkert fjör.

Mjög fyndið augnablik, Sindri Snær og og Tiago að reyna að ná til boltans en einhvern veginn tókst þeim að festa skóna sína saman. Tók smá tíma að losa en hafðist á endanum.

Tiago með skot fyrir utan teig en rétt yfir mark Keflavíkur. Mathias hefði nú líklega gripið þetta ef hann hefði farið á markið.

Leikurinn er hafinn. Gestirnir í Keflavík byrja með boltann og spila í átt að KFC.

Liðin ganga nú inn á völlinn, Fram í hefðbundnum bláum treyjum og hvítum buxum og sokkum. Keflavík í alhvítum adidas búningum, svolítið eins og Real Madrid. Sjáum hvort gæðin verði eftir því í dag.

Tólf stiga hiti og algjör dúnalogn hér í Úlfarsárdalnum en þó smá skýjað. Frábært sumarveður og ekki skemmir að Framarar eru að spila Dimmu í hljóðkerfinu.

Jón Sveinsson þjálfari Fram gerir fjórar breytingar á liði sínu frá 4 -2 tapi gegn KA í síðustu umferð.

Tryggvi Snær Geirsson, Þórir Guðjónsson, Adam Örn Arnarson, Brynjar Gauti Guðjónsson koma inn en óvænt er Guðmundur Magnússon settur á bekkin eins og Magnús Þórðarson, Óskar Jónsson og Orri Sigurjónsson.

Sigurður Ragnar Eyjólfsson þjálfari Keflavíkur gerir enga breytingu frá markalausa jafnteflinu gegn Breiðabliki í síðustu umferð.

Bragi Karl Bjarkason sem hefur farið með himinskautum með ÍR í 2. deildinni í sumar spáði í leiki umferðarinnar fyrir Fótbolta.net.

Fram 3 - 3 Keflavík
Þetta verður rosalegur markaleikur. Það verður spilaður samba bolti hjá Fram og Fred setur þrennu. Sindri Snær svarar í sömu mynt og setur óvænta þrennu fyrir Kef. Hann má svo fara drífa sig að koma heim í Breiðholtið.

Bragi spáði í umferðina.

Fram og Keflavík mættust þrisvar í Bestu-deildinni á síðustu leiktíð. Í fyrsta leiknum 3. júlí vann Keflavík 3 - 1 heima.

Annar leikurinn var ansi skrautlegur en þá vann Keflavík 4 - 8 útisigur.

Keflavík vann svo einnig þriðja leikinn sem var í neðri hluta deildarinnar eftir skiptingu. Þá fór 4 - 0.

Leikurinn í dag er sannkallaður fallbaráttuslagur og gríðarlega mikilvægur fyrir bæði lið.

Gestirnir í Keflavík sitja á botni deildarinnar með 6 stig sem þeir fengu úr einum sigurleik í fyrstu umferð gegn Fylki og þremur jafnteflum.

Þeir gætu með sigri farið upp fyrir Framara í töflunni en Fram er í 10. sætinu með 8 stig. Hafa unnið tvo gegn ÍBV og Stjörnunni og gert tvö jafntefli.

Dómari leiksins í dag er Guðgeir Einarsson. Hann hefur verið að standa sig vel í sumar og er verðlaunaður með að vera færður upp um flokk í Bestu-deild karla.

Guðgeiri til aðstoðar á línunum verða þeir Guðmundur Ingi Bjarnason og Antoníus Bjarki Halldórsson.

Vilhjálmur Alvar Þórarinsson er svo skiltadómari.

Gamla goðsögnin Kristinn Jakobsson er svo fulltrúi KSÍ sem mun hafa eftirlit með störfum dómara og umgjörð leiksins.
Guðgeir dæmir leikinn í dag.

Góðan daginn og verið velkomin í Úlfarsárdalinn. Hér verður textalýsing frá leik Fram og Keflavíkur.

Leikurinn hefst klukkan 19:15 og hér verður allt það helsta.