Spánverjar miklu betri og vinna verðskuldaðan sigur. Okkar stelpur verða að þjappa sér saman því næst er það mikilvægur leikur gegn Tékklandi. Stelpurnar þurfa helst sigur þar til að eiga möguleika á að fara áfram. Áfram gakk!

Enn syngja íslensku stuðningsmennirnir.

Íslenska liðið svo sannarlega að mæta ofjörlum sínum í dag.

Þetta hefur verið rólegt síðustu mínútur. Þær spænsku halda boltanum og virðast sáttar með að vinna 2-0.

Íslenska stuðningsfólkið heldur áfram að styðja þétt við bakið á liðinu.

Sædís með stórhættulega hornspyrnu á fjærstöngina og það má ekki miklu muna að Freyja Karín komist í boltann.

Sigdís Eva að koma sterk inn. Hún vinnur hér hornspyrnu.

Ísabella Sara og Sigdís Eva eru báðar fæddar árið 2006.

Lucía Corrales með hættulega fyrirgjöf en Jakobína nær að bjarga. Þær biðu þrjár á fjærstönginni og þetta hefði 110 prósent endað með marki ef Jakobína hefði ekki verið svona vel vakandi.

Þreföld skipting á leiðinni hjá Íslandi.

Martina í mjög góðu færi inn á teignum en hún hittir einfaldlega ekki boltann þegar hún reynir að skalla hann að marki.

Spurning hvort það væri ekki sniðugt að hreyfa aðeins við liðinu, fríska upp á þetta.

Írena tekur spyrnuna en hún fer lengst yfir markið.

Þetta er skotfæri, þessi aukaspyrna.

Hin serbneska Cvetkovic hefur ekki heillað mig með frammistöðu sinni. Íslenska liðið að vinna boltann hátt á vellinum en þá gefur hún Spáni ódýra aukaspyrnu.

Við náum ekki að skapa okkur færi út úr hornspyrnunni.

Emelía með fínan sprett upp völlinn. Hún er komin inn á teiginn og sækir hornspyrnu. Það besta frá íslenska liðinu í langan tíma.

Það er ansi líklegt að spænska liðið skori mark númer þrjú fljótlega, þær pressa og pressa.

Spánverjar byrja seinni hálfleikinn af miklum krafti. Íslenska liðið er mjög aftarlega á sínum eigin vallarhelmingi.

Það er kominn hálfleikur. Ísland átti flottan kafla fyrstu tíu mínúturnar en svo tók Spánn algjörlega yfir. Tveggja marka forystan er verðskuldað.

Zubieta reynir skot af rúmum 30 metrum. Lengst yfir markið.

Wifi komin ein í gegn en setur boltann framhjá markinu. Ekki nægilega vel tengd í færinu þarna.

Staðan orðin mjög erfið fyrir íslenska liðið. Varnarleikurinn verið dapur í þessum leik, því miður.

Katla reynir fyrirgjöf en þær spænsku komast fyrir og snúa vörn í sókn.

Það er búið að vera alltof auðvelt fyrir spænska liðið að komast í gegnum íslensku vörnina.

Fanney að halda íslenska liðinu í leiknum þessa stundina. Jone Amezaga labbar í gegnum vörnina og er komin í mjög fínt færi, en Fanney ver mjög vel.

Bartel með stórkostlega sendingu inn fyrir vörn íslenska liðsins og Spánn fær tvö dauðafæri, en í bæði skiptin ver Fanney Inga mjög vel! Alltof auðvelt fyrir Spán að komast í dauðafæri, ein sending í gegnum vörnina.

Jelena Cvetkovic dæmir hér brot á Vígdísi Lilju. Vægast sagt furðulegur dómur... þar sem Vigdís gerði nákvæmlega ekkert af sér þarna, það var brotið á henni. Vigdís Lilja hefur byrjað þennan leik vel.

Spænska liðið við það að komast í mjög gott færi en okkar stelpur skila sér vel og ná á endanum að loka.

Spánverjar eru ríkjandi meistari og hafa unnið þessa keppni fjórum sinnum. Ísland er að mæta gríðarlega sterku liði hér í dag, það er á hreinu.

Þær spænsku eru að hóta öðru marki.

Ágætis spil hjá spænska liðina. Boltinn berst út til vinstri og svo kemur fyrirgjöf sem Fiamma skallar yfir markið.

Við fáum víkingaklapp í stúkunni.

Íslenska liðið er óhrætt í byrjun leiks og hefur náð að skapa sér flottar stöður.

Hættulegur bolti inn á teiginn en Emelía nær ekki að taka á móti honum. Ef hún hefði náð valdi á þessum bolta þá hefði hún verið komin í dauðafæri.

Sædís með ágætis spyrnu en Spánverjar ná að koma boltanum frá.

Katla kemst í ágætis skotfæri fyrir utan teig og lætur vaða. Boltinn stefnir í netið en Font nær að blaka boltanum yfir. Þarna mátti ekki miklu muna! Ísland fær hornspyrnu.

Spánverjar í algjöru dauðafæri. Bartel gat í raun ekki fengið betra skotfæri á teignum og hún nær skotinu. Það er á leiðinni í hornið en Sædís Rún, fyrirliðinn, bjargar frábærlega!

Þá er þetta farið af stað. Snædís María tekur upphafsspyrnu Íslands á þessu Evrópumóti!

Leikurinn í dag fer fram á Stade Leburton í Tubize í Belgíu. Þetta er völlur sem rúmar um 8 þúsund manns, mjög flottur leikvangur.

Þjóðsöngvarnir að baki. Íslenski þjóðsöngurinn einstaklega vel sunginn hjá stelpunum okkar og þeim fjölmörgum stuðningsmönnum sem mættir eru til Belgíu að styðja við bakið á liðinu. Stutt í að flautað verði til leiks.

Stelpurnar byrjuðu á því að vinna sig upp úr B-deild undankeppninnar þar sem þær voru í riðli með Færeyjum, Litháen og Liechtenstein. Íslenska liðið vann alla leiki sína og endaði með markatöluna 15:0. Svo var það erfiðara verkefni í annarri umferð þar sem stelpurnar voru komnar upp í A-deild. Þá voru þær í riðli með Danmörku, Svíþjóð og Úkraínu. Íslenska liðið byrjaði á því að vinna bæði Danmörku og Svíþjóð en gerði svo jafntefli gegn Úkraínu í lokaleiknum. Það dugði til að komast á mótið. Staðan í milliriðlinum: 1. Ísland - 7 stig 2. Danmörk - 6 stig 3. Svíþjóð - 3 stig 4. Úkraína - 1 stig

Sjö í byrjunarliðinu eru fæddar 2004, þrjár 2005 og Emelía Óskarsdóttir er fædd árið 2006. Emelía er því enn gjaldgeng í U17 landsliðið. Allar í byrjunarliðinu spila í Bestu deildinni.

Stelpurnar eru í afar erfiðum riðli og fá mjög erfitt próf í fyrsta leik gegn Spáni. Það verður fróðlegt að sjá hvernig gengur í leiknum í kvöld en það yrði frábært ef stelpurnar myndu fá stig út úr þessum leik.

U19 landslið kvenna hefur í kvöld leik í lokakeppni Evrópumótsins. Liðið mætir Spáni en hægt verður að fylgjast með honum í textalýsingu hérna.