SKÝRSLAN: Mjög gott svar hjá Fjölni sem horfir í að gera hið ómögulega
Hvað réði úrslitum?
Fjölnismenn voru bara miklu betri í þessum leik. Þeir ná að skora tvö mörk snemma og í þetta skiptið halda þeir áfram, missa ekki taktinn og bæta við. Virkilega flottur leikur hjá Fjölnisliðinu. Þeir voru staðráðnir í að svara fyrir vonbrigðin gegn Þrótti í síðasta leik.
Bestu leikmenn
1. Dagur Ingi Axelsson (Fjölnir)
Stórkostlegur leikur hjá þessum skemmtilega kantmanni. Hann lagði upp þrjú mörk og vann eina vítaspyrnu. Væri að gera sterkt tilkall í leikmann umferðarinnar ef Elmar Kári Enesson Cogic hefði ekki skorað fimm mörk fyrir Aftureldingu.
2. Máni Austmann Hilmarsson (Fjölnir)
Máni var virkilega góður á miðsvæðinu, var mikið í boltanum og lét hann flæða vel. Skoraði úr vítaspyrnu og var öflugur fyrir sitt lið. Fleiri leikmenn úr Fjölnisliðinu gerðu sterkt tilkall í að vera í þessum dálki.
Atvikið
Ég ætla að segja að það hafi verið annað markið sem Fjölnir skorar. Afskaplega auðvelt mark og það gefur Fjölnismönnum gott forskot, kemur þeim í þægilega stöðu.
Hvað þýða úrslitin?
Fjölnir er áfram í öðru sæti deildarinnar og horfir áfram í það að reyna að ná Aftureldingu, þó það verði erfitt - í raun svo gott sem ömögulegt. Ægir er á botninum en heldur áfram í vonina að halda sér uppi; þeir eru bara þremur stigum frá öruggu sæti.
Vondur dagur
Líklega versti leikur Ægis á tímabilinu, þeir voru gjörsigraðir í dag. Allir leikmenn liðsins nema Dimitrije Cokic áttu slæman dag. Þeir voru í vandræðum sérstaklega vinstra megin í vörninni. Sladjan Mijatovic meiddist illa og þeir áttu í erfiðleikum með að leysa það. Þá er þetta líklega versti leikur sem ég hef séð Stefan Dabetic spila.
Dómarinn - 9
Norðmaðurinn með flautuna stóð sig virkilega vel og var með góða stjórn á leiknum.