Lið á siglingu gegn liði sem er í rosalegu basli með sjálfstraust. Skagamenn áttu leikinn að mestu og refsuðu úr föstum leikatriðum. Ef ekki fyrir Aron Dag í marki Grindavíkur hefði sigurinn orðið stærri. Grindavík má þó eiga að þeir reyndu að koma jákvæðir út í síðari hálfleikinn eftir brekku i þeim fyrri en fengu blauta tusku í andlitið um miðbik hans og var þá allur vindur úr þeim að mestu.

Seinna mark ÍA gæti mögulega hafa verið ólöglegt. Einhverjir Grindvíkingar töluðu um mögulega rangstæðu en þess utan virtist sem svo að Hlynur Sævar hefði mögulega handleikið knöttinn þegar hann skoraði. Hefði líklega engu breytt en stendur þó upp úr fyrir mér.

Skagamenn sitja enn í þriðja sæti og elta Fjölni sem er skammt undan í öðru sæti. Fjölnir með 26 stig og ÍA með 24 en á þó leik til góða á Fjölni. Grindavík er komið niðurfyrir umspilslínu og situr í sjötta sæti með 15 stig.

Okkur hér á Fótbolta.net er uppálagt að velja ekki lið sem heild í reitinn vondur dagur. Ég á þó bágt með að gera annað sem stendur. Það varð ljóst mjög fljótlega í leiknum í kvöld þegar lið ÍA ógnaði í blábyrjun að liði Grindavíkur skortir sjálfstraust. Menn urðu strax litlir í sér og fóru að taka rangar ákvarðanir og virkuðu hreinlega "out of sync" svo maður sletti. Lagaðist ögn þegar á leið en samt virtust þeir aldrei líklegir til þess að vinna sig ínn í leikinn. Það er einhver krísa í Grindavík og vonandi að Helgi og hans teymi finni lausn á því.

Svíinn átti stórfínan fyrri hálfleik að mínu mati fyrir utan eitt atvik þar sem hann stöðvaði leik vegna höfuðmeiðsla á furðulegu augnabliki eftir að hafa ákveðið að halda leik áfram þrátt fyrir þau sekúndum áður. Hallaði aðeins undan fæti í þeim síðari þegar hann fór að reyna fullmikið að hafa stjórn á leiknum og breytti eigin línu. Seinna mark ÍA er svo spurningamerki er hann ræddi vel og lengi við aðstoðardómara sinn eftir að hafa dæmt mark sem svo fékk að standa þótt vafasamt væri. Sleppur þó við falleinkunn og kemur út svona sirka á pari.