SKÝRSLAN: Níu og hálfur fingur Víkinga á skildinum góða
Hvað réði úrslitum?
Gæði, fagmennska og þéttur leikur Víkinga gerði það að verkum að Valsmenn sáu aldrei til sólar í leiknum. Þeir áttu einfaldlega ekki séns á móti þessu agaða og frábærlega vel spilandi Víkingsliði.
Bestu leikmenn
1. Birnir Snær Ingason
Var virkilega góður og ógnandi allan þann tíma sem hann var inni á vellinum. Hann þurfti að fara af velli vegna meiðsla á 67. mínútu og vonandi að það sé ekki alvarlegt.
2. Erlingur Agnarsson
Mér fannst Erlingur virkilega góður í kvöld. Með tvær stoðsendingar og vinnsla og kraftur í honum. Fær ekki alveg nógu mikið lof finnst mér.
Atvikið
Þegar Adam Ægir Pálsson kom inn á sem varamaður byrjaði Víkingshluti stúkunnar að syngja ,,Adam er víkingur, Adam er Víkingur"
Hvað þýða úrslitin?
Arnar Grétarson kastaði inn hvíta handklæðinu í viðtali eftir leik og sagði að 11 stiga forskot Víkinga væri of mikið. Ég held að ég og flestir aðrir séu sammála því þótt Arnar Gunnlaugsson tæki ekki alveg undir þá skoðun undirritaðs að hægt væri að setja (staðfest) á að Víkingar væru Íslandsmeistarar 2023.
Vondur dagur
Ég vil ekki taka neinn einn út úr arfaslöku Valsliði. Gæti nefnt alveg örugglega 10 af 11 leikmönnum.
Dómarinn - 9
Annar leikurinn í röð þar sem ég gef Erlendi Eiríks 9 í einkunn. Besti dómari landsins.