SKÝRSLAN: FH tryggði sér 5. sætið þó KR hafi átt nóg af færum
Hvað réði úrslitum?
FH kláraði sín færi en ekki KR. KR-ingar fengu haug af færum í fyrri hálfleik en fóru rosalega illa með þau. FH nýtti sér síðan þau færi sem þeir fengu og því kannski ekki alveg sanngjörn úrslit en KR-ingar geta sjálfum sér um kennt.
Bestu leikmenn
1. Björn Daníel Sverrisson (FH)
Björn Daníel var öflugur á miðsvæðinu bæði sóknarlega og varnarlega. Hann stýrði spilinu vel og var hættulegur inn í teig inn á milli.
2. Kjartan Henry Finnbogason (FH)
Kjartan gerði það sem markaskorarar eiga að gera og það er að skora mörkin. Hann gerði kannski ekkert svakalega mikið meira en það en hann fer sáttur frá borði með 2 mörk á bakinu.
Atvikið
FH fær vítaspyrnu 5 mínútum eftir að KR jafnar og leikurinn verður frekar rólegur eftir það. KR nær ekki að skapa jafn góð færi og þeir höfðu verið að gera og FH-ingar sigla sigrunum heim.
Hvað þýða úrslitin?
FH endar í 5. sæti í deildinni og KR í því 6. Lítið annað að segja við því hvorugt liðið átti möguleika á að berjast um evrópusæti fyrir leik.
Vondur dagur
Benóný Breki Andrésson er búinn að koma virkilega ferskur inn í KR liðið upp á síðkastið en hann mun vilja gleyma þessum leik sem fyrst. Hann átti í raun að vera kominn með þrennu í fyrri hálfleik en hann fór rosalega illa með nokkur dauðafæri.
Dómarinn - 8
Þetta var ekkert svakalega erfiður leikur fyrir Pétur og hans teymi. Vítaspyrnudómurinn var held ég réttur og annars var lítið af stórum ákvörðunum að taka.