ÍR-ingarnir voru bara betri á öllum sviðum í dag, allavega í seinni hálfleiknum. Það er líklega rétt það sem Magnús Már, þjálfari Aftureldingar, sagði eftir leik; þeir hefðu getað spilað til miðnættis án þess að skora. Mosfellingar voru litlir lengst af og eftir fyrsta markið var aldrei spurning hvernig þetta myndi enda. Fyrsta markið var gjöfin að sigrinum. Viljið þið sigurinn? Takið hann þá. ÍR-ingarnir eru betri en flestir bjuggust við fyrir mót, þeir eru bara drullugóðir.

Það er fyrsta markið sem ÍR skorar. Fyrirgjöf sem Arnar Daði, markvörður Aftureldingar, missir klaufalega í markið. Hausar fóru niður hjá Mosfellingum og þeir náðu aldrei að koma sér í gang eftir þetta.

ÍR er núna tveimur stigum á undan Aftureldingu eftir ellefu leiki. Hver hefði búist við þessu fyrir mót? Kannski Sölvi Haraldsson og þessir veikustu ÍR-ingar, en samt örugglega ekki. ÍR er í fimmta sæti og það er ókeypis að leyfa sér að dreyma um Bestu deildina. ÍR var síðast í efstu deild árið 1998 og draumurinn um annað slíkt tímabil, hann er að verða til þó hann sé enn frekar fjarlægur. Afturelding er í sjötta sæti, mikil vonbrigði það.

Arnar Daði Jóhannesson átti afskaplega vondan leik í marki Aftureldingu. Missti boltann inn í fyrst markinu og það er óafsakanlegt í svona jöfnum leik á þessu stigi. Þú mátt ekki gera svona hörmuleg mistök, því miður. Svo er hægt að skrá þriðja markið líka á hann, missir boltann undir sig. En annars þurfa allir leikmenn og þjálfarateymi Aftureldingar að líta í spegil. Það er mikill munur á liðinu og stemningunni í kringum liðið frá síðasta tímabili. Það er afskaplega dauft eitthvað yfir þessu og stöðugleiki er orð sem þetta lið bara skilur ekki. Mosfellingar þurfa að rífa sig í gang ef þeir ætla að eiga einhvern möguleika á að fara upp því það sem er í gangi núna, það er bara vont.

Helgi Mikael og hans teymi með allt á hreinu. Frábærlega dæmdur leikur.