Gunnar Oddur flautar til leiksloka. Skemmtilegur leikur þó að hann endi með markalausu jafntefli. Þróttarar eflaust svekktara liðið en þeir fengu urmul færa.

Kári Kristjáns tekur spyrnuna en hún fer beint í varnarmann Fjölnis.

Villi Kaldal með gott skot fyrir utan teig en Halldór ver vel í marki gestanna.

Leikurinn heldur betur róast eftir frábæra byrjun á síðari hálfleik.

Sigurður Steinar með skot fyrir utan teig sem fer framhjá marki gestanna.

Máni Austmann með fast skot úr þröngri stöðu en Þórhallur ver vel.

Viktor Steinarsson með skot sem fer í hliðarnetið að utanverðu.

Fjölnismenn mjög ólíkir sjálfum sér hér í kvöld.

Vilhjálmur Kaldal enn og aftur í færi en nú ver Halldór Snær vel.

Fyrirgjöf frá vinstri beint á kollinn á Villa Kaldal sem stangar boltann í stöngina. Þróttarar vaða í færum!

Þróttarar að fá sína fjórðu hornspyrnu í röð en ekkert kemur úr henni.

Villi Kaldal fær boltann út í teiginn og tekur skot sem fer yfir. Þróttarar byrja seinni hálfleikinn betur!

Kári Kristjánsson með skot langt framhjá eftir gott spil Þróttara.

Daníel Ingvar liggur niðri og þarfnast aðhlynningar, virðist vera sárþjáður.

Unnar Steinn með skalla rétt yfir markið í sinni fyrstu snertingu sem Þróttari!

Gestirnir byrja með boltann.

+2 Stórskemmtilegur fyrri hálfleikur á enda, Þróttarar búnir að fá hættulegri færi en gestirnir hafa sótt í sig veðrið eftir slæma byrjun. Hljóta koma mörk í þetta í seinni hálfleik!

Dagur Ingi með skot af löngu færi en boltinn endar á bílastæðinu fyrir aftan mark Þróttara, engin hætta.

Aron Snær með stórhættulegan bolta fyrir mark gestanna en enginn Þróttari mættur til að pota boltanum inn.

Máni Austmann með skot rétt framhjá marki Þróttara. Fjölnismenn að vakna.

Gestirnir æða upp í skyndisókn, boltinn berst á Axel Frey sem lætur vaða en tilraun hans fer yfir markið.

Axel Freyr með kraftlítið skot á markið eftir hættulega sókn Fjölnis.

Þórir Guðjóns með skot af löngu færi sem Halldór ver örugglega í marki gestanna.

Máni Austmann með skot úr þröngri stöðu sem Þórhallur ver vel.

Halldór Snær markvörður gestanna í allskonar veseni, missir boltann og er ekki í stöðu. Iaroshenko gefur fyrir á Villa Kaldal sem er gegn auðu marki en tekur sér of langan tíma og varnarmaður Fjölnis á frábæra tæklingu og kemur boltanum frá.

Köttarar láta veðrið ekkert á sig fá, góð stemning hér á Avis vellinum.

Kostiantyn Iaroshenko fær boltann í markteig gestanna, nær að snúa og þrumar boltanum í þverslánna! Fjölnismenn stálheppnir þarna.

Þróttarar líflegri aðilinn fyrstu tíu mínúturnar.

Heimamenn byrja með boltann.

Liðin ganga til vallar, nú styttist í að þessi spennandi viðureign hefjist!

Íslenska sumarið heldur áfram að heilla, rigning og rok hér í Laugardalnum.

Verið er að taka upp sjónvarpsþætti á milli bekkjanna núna rétt fyrir leik en mikið af tökuliði er á staðnum. Í þáttunum fer Halldór Gylfason með hlutverk fótboltaþjálfara.

Sigurvin Ólafs þjálfari Þróttara gerir eina breytingu frá síðasta leik. Inn í byrjunarliðið kemur Kostiantyn Iaroshenko í stað Sigurðar Steinars sem tekur sér sæti á bekknum. Fjölnir gerði dramatískt jafntefli við Dalvík/Reyni í síðasta leik, Úlfur Arnar þjálfari Fjölnis gerir þrjár breytingar á liði sínu frá þeim leik. Inn í byrjunarliðið koma þeir Júlíus Mar, Kristófer Dagur og Axel Freyr. Úr byrjunarliði Fjölnis víkja þeir Bjarni Þór, Vilhjálmur Yngvi og Orri Þórhallson.

LEIKDAGUR!

Fulla ferð áfram Þróttarar, ekkert stopp! Efsta liðið Lengjudeildarinnar mætir í kvöld, hörkuleikur þar sem við ætlum okkur sigur.
???????????????? til sölu.
19.15 AVIS völlurinn#lifi pic.twitter.com/JW0rY04K4T

— Þróttur (@throtturrvk) July 31, 2024

Már Ægisson, maður leiksins þegar Fram lagði Val á sunnudag, spáir Þrótti sigri í skemmtilegasta leik umferðarinnar. Þróttur 4 - 1 Fjölnir Skemmtilegasti leikur umferðarinnar. Þróttarar á bullandi siglingu og Unnar Steinn er að fara skora 2 mörk í fyrsta leiknum sínum. Gríski og Þórir Guðjóns skora hin og myndarlegasti leikmaður deildarinnar Axel Freyr klórar í bakkann og setur eitt gullfallegt mark.

Ef litið er á síðustu leiki eru þetta tvö af heitustu liðum deildarinnar sem mætast hér í kvöld. Eftir erfiða byrjun á mótinu hafa Þróttarar svo sannarlega stigið upp og hafa unnið 4 af síðustu 5 leikjum og eru komnir í 7. sæti deildarinnar. Topplið Fjölnis eru með 6 stiga forystu á toppi deildarinnar og hafa einungis tapað einum leik. Í síðasta leik gerðu Fjölnir hádramatískt jafntefli gegn Dalvík/Reyni.

Góðan dag lesendur góðir og veriði velkomin í þráðbeina textalýsingu beint úr Laugardalnum, nánar tiltekið Avis vellinum þar sem Þróttarar taka á móti Fjölni í fimmtándu umferð Lengjudeildarinnar.