SKÝRSLAN: Keflavík að læðast aftan að toppliðunum
Hvað réði úrslitum?
Lukkan? Menn skapa sína heppni og allt það og í dag féll meira með Keflavík en Grindavík. Tökum það ekki af heimamönnum að þeir unnu vel fyrir sínu og áttu sigurinn skilið. Hefði samt alveg verið áhugavert að sjá Grindavík jafna og hvernig leikurinn hefði þróast eftir það.
Bestu leikmenn
1. Axel Ingi Jóhannesson
Leikmaður sem fær alls ekki nógu mikið lof fyrir frammistöðu sína með Keflavík. Feykilega öflugur í hægri bakverðinum og verið það í mest allt sumar.
2. Kári Sigfússon
Kvikur og skemmtilegur leikmaður. Duglegur að hlaupa og klókur að finna sér svæði. Uppskar gott mark þegar hann var klár í frákast eftir stangarskot.
Atvikið
Skrautlegt mark Grindavíkur stendur svolítið upp úr. Ekkert í gangi og að því er virtist nokkuð þægilegur bolti fyrir Ásgeir Orra að grípa eftir fyrirgjöf Kwame frá hægri. Ásgeiri tókst þó að missa boltann yfir línuna og kvartaði lítið yfir því að mark væri dæmt.
Hvað þýða úrslitin?
Keflavík lyftir sér upp í þriðja sæti deildarinnar með 27 stig, aðeins stigi á eftir ÍBV í öðru sætinu og fimm stigum á eftir Fjölni sem er á toppnum. Þessi lið mætast einmitt í þessari umferð auk þess sem Keflavík á eftir að mæta þeim báðum á heimavelli. Grindavík í níunda sæti með sautján stig.
Vondur dagur
Adam Árni Andersen þurfti að yfirgefa völlinn í dag vegna meiðsla. Verandi mættur á gamla heimavöllinn vildi hann eflaust sýna meira en það gekk ekki í dag.
Dómarinn - 8
Þægilegt hjá tríóinu og leikstjórn góð. Þurftu ekki að taka stórar ákvarðanir og unnu sitt starf með miklum sóma