SKÝRSLAN: Lygileg endurkoma FH í Keflavík
Hvað réði úrslitum?
Hverju á maður að svara eftir svona leik? Að öllu jöfnu er 3-0 í hálfleik uppskrift að game over. Því var ekki að heilsa í kvöld. Eftir að hafa átt sinn besta hálfleik á tímabilinu hrundi allt sem hrunið gat í leik Keflavíkur og FH sem átti að sama skapi sinn versta hálfleik gekk á lagið. FH liðið sem sá ekki til sólar í fyrri hálfleik tók öll völd og þjarmaði að heimakonum trekk í trekk. Er hægt að tala um sanngjarnan sigur? Mögulega ekki en FH liðið gerði bara allt sem það gat og eflaust meira til til þess að freista þess að kreista allt út úr þessum leik. Með þessari líka fínu niðurstöðu.
Bestu leikmenn
1. Ariela Lewis
Henni verður ekki kennt um tapið svo mikið er víst. Tvö mörk og stoðsending ætti að öllu jöfnu að duga til sigurs. Verra að það var á 45 mínútum og hún komst lítið í takt við leikinn í síðari hálfleik.
2. Hildur Katrín Snorradóttir
Upprunalega var mark hennar skráð á Örnu liðsfélaga hennar en Hildur Katrín sem kom inn á í hálfleik átti mikin þátt í að snúa leiknum burtséð frá því. Það er lúxus fyrir Guðna þjálfara að hafa stelpur á bekknum sem er tilbúnar í að koma inná af bekknum og gefa allt sitt til að sanna það fyrir honum hversu galið það er af honum að setja þær þar.
Atvikið
Sigurmark Breukelen Lachelle verður að vera það. Fullkomnaði kvöldið fyrir FH og kannski sérstaklega kærasta hennar sem lét vel í sér heyra í stúkunni.
Hvað þýða úrslitin?
FH tryggir sér sæti í efri hluta deildarinnar og er í dag með 25 stig í fimmta sæti. Keflavík áfram á botninum með níu stig.
Vondur dagur
FH liðið mætti ekki til leiks í fyrri hálfleik og var refsað fyrir það. Þeim er samt örugglega að mestu sama eftir á þar sem Keflavík gerði slíkt hið sama í þeim síðari og var refsað á grimmilegan hátt fyrir það. Skrifum þetta því að endingu á Glenn þjálfara Keflavíkur sem gengur með sínu liði inn í hálfleikinn með þriggja marka forskot en yfirgefur völlinn þrátt fyrir það að leik loknum með núll stig.
Dómarinn - 6
Það eru alveg atvik í þessu sem ég væri til í að sjá og skoða betur. Dómarar réðu samt á engan hátt úrslitum leiksins og gerðu sitt á pari svo að segja.