Gleðiefni að Hansen sé leikfær
Fyrirliðinn Nikolaj Hansen var tæpur fyrir leikinn, rétt eins og færeyski varnarmaðurinn Gunnar Vatnhamar. En þeir eru báðir leikfærir og eru báðir í byrjunarliðinu hér í dag. Klukkan er að verða 19 að staðartíma, 16 að íslenskum tíma. Áfram Víkingur!

Engin súld í Tallinn Það er flott veður í Eistlandi, um 24 gráðu hiti sem stendur. Leikurinn verður sýndur beint á Stöð 2 Sport fyrir þau ykkar sem viljið horfa. Það er einmitt stuðst við þá útsendingu í þessari textalýsingu.

Byrjunarliðin eru komin inn Arnar Gunnlaugsson, þjálfari Víkings, gerir tvær breytingar frá fyrri leik liðanna. Gunnar Vatnhamar kemur inn í liðið fyrir Jón Guðna Fjóluson og Nikolaj Hansen kemur inn fyrir Danijel Dejan Djuric. Jón Guðni og Danijel eru á bekknum. Þar eru einnig menn eins og Erlingur Agnarsson, Helgi Guðjónsson og Tarik Ibrahimagic.

Samkvæmt UEFA er Víkingur í 4-4-2 með þá Nikolaj og Aron Elís í fremstu línu.

Arnars Gunnlaugs: Allt annað en að komast áfram er bara stórslys
Fótbolti.net ræddi við Arnar Gunnlaugsson, þjálfara Víkings, rétt áður en liðið hélt á lokaæfingu sína fyrir leikinn mikilvæga.

„Á pappírnum eigum við örugglega að vinna þetta lið, en við áttum líka að vinna Shamrock og við gerðum mistök í þeim leik sem kostuðu okkur dýrt. Við þurfum bara að læra af því og læra fljótt," segir Arnar.

Arnar var ánægður með ferðalagið út til Tallinn. „Við erum í góðu yfirlæti, á geggjuðu hóteli og Tallinn er flott borg. Það hefur farið vel um okkur, eins og í öllum okkar Evrópuleikjum. Þetta eru hrikalega skemmtilegar ferðir, hópurinn nær að þétta sig saman og það er mikill hugur og einbeiting í hópnum."

Arnar er sammála því að það sé krafa að komast áfram.

„Ég er algjörlega sammála því. Við krefjumst þess af okkur sjálfum að við vinnum þennan leik. Allt annað en að komast áfram á morgun er bara stórslys, það er ekkert flóknara en það. Við viðurkennum það með glöðu geði," segir Arnar en viðtalið má sjá í heild hér:

   14.08.2024 17:18

Arnars Gunnlaugs: Allt annað en að komast áfram er bara stórslys

Skylda Víkings að halda uppi heiðri Íslands í Evrópu
Víkingur stendur eitt íslenskra liða eftir í Evrópukeppni og mun vonandi klára þetta verkefni. Það er hreinlega hægt að setja kröfu á Víkinga að gera það, í tveggja leikja einvígi hreinlega eiga Íslandsmeistararnir að vinna Flóru frá Tallinn ef allt er eðlilegt. Þeir eru mun betra lið.

Arnar Gunnlaugsson þjálfari Víkings talaði sjálfur um það eftir fyrri leikinn að hinir mótherjar Víkings hingað til í Evrópu; Shamrock Rovers frá Írlandi og Egnatia frá Albaníu, séu betri en þetta eistneska lið.

Yrðu mjög óvænt úrslit ef heimamenn vinna
Eins og allir lesendur vita vel þá eru svakalegir fjármunir í húfi fyrir félagslið að komast langt í Evrópu og Víkingur er í sannkölluðu dauðafæri að komast í riðlakeppni Sambandsdeildarinnar, líkt og Blikum tókst í fyrra. Þrátt fyrir að úrslitin í fyrri leiknum hafi ekki verið að óskum eru Víkingar sigurstranglegri og það endurspeglast vel í stuðlum veðbanka.

Lengjan er með stuðulinn 3,75 á sigur Flóru en 1,69 á útisigur Víkings. Stuðlar sem eru í takt við aðra veðbanka sem ég hef verið að glugga í. Eistneska deildin er mun lægra skrifuð en sú íslenska, hreinlega í ruslflokki, og Flóra með talsvert veikara lið núna en það sem tryggði þeim meistaratitilinn á síðasta ári. Það sést á stöðutöflunni þar sem liðið er í dag nítján stigum frá toppnum í heimalandinu.

Ef Víkingur klárar þennan skyldusigur (orð sem allir þjálfarar hata) þá er framundan einvígi við Santa Coloma frá Andorra um sæti í sjálfri riðlakeppninni. Besti dráttur sem Víkingur gat fengið og sýnir glöggt tækifærið sem Íslandsmeistararnir hafa á því að komast í riðlakeppni. Svona er staðan hjá Víkingi þrátt fyrir að hafa fallið við þá lágu hindrun sem Shamrock Rovers átti að vera í fyrstu umferð í forkeppni Meistaradeildarinnar.

Verður Flóra í lágblokk?
„Við þurfum ekki að fara til Eistlands og vera hræddir. Við förum með kassann út. Þetta er alltaf sama gamla sagan. Við þurfum að halda aga og einbeitingu úti. Ein mistök og þú ert úr leik," sagði Arnar Gunnlaugsson í viðtali eftir fyrri leikinn sem endaði með 1-1 jafntefli þrátt fyrir svakalega yfirburði Víkings og fjölda tækifæra.

„Mér fannst fyrir einvígið að ef við ættum tvo toppleiki, þá værum við komnir í gegn. Það er ekki spurning. Ég trúi því ekki að Flora fari aftur í lágblokkina. Mögulega samt, Shamrock gerði það líka. Strákarnir eiga að líta á það sem hrós - hversu langt við erum komnir - að sjá hversu langt lið leggjast niður á móti okkur. Það er okkar að finna lausnir, sama hversu erfitt það er."

Högg fyrir íslenskan fótbolta
Eftir að hafa verið rétt við botninn þá hefur Ísland verið á uppleið á styrkleikalistanum hjá UEFA með betri úrslitum okkar félagsliða. En gengið hefur verið vonbrigði þetta sumarið, hingað til allavega.

Tap Stjörnunnar gegn Paide 4-0 var hreinlega niðurlægjandi og Breiðablik klúðraði sínu verkefni rækilega með því að falla út gegn Drita frá Kósovó, þar sem heimaleikurinn varð liðinu að falli. Við megum ekki við frekara bakslagi.

Víkingur mun þó vonandi halda áfram að safna stigum fyrir íslenskan fótbolta. Liðið hefur verið byggt upp til að komast í riðlakeppni Evrópu og á að ná því markmiði í ár. Áfram Víkingur!

Fyrri leikurinn endaði 1-1

   08.08.2024 21:31

Klaufaskapur að fara ekki með stórt forskot út

   08.08.2024 21:16

Arnar Gunnlaugs: Þetta er alltaf sama gamla sagan

   08.08.2024 21:24

Gísli Gotti: Fannst við miklu betri en þeir

Dómari
Michal Ocenas frá Slóvakíu er með flautuna í dag. Allt teymið kemur frá Slóvakíu. Þar á meðal VAR dómarinn sem er Filip Glova.

Eystrasaltið býður góðan dag!
Verið hjartanlega velkomin í beina textalýsingu frá Tallinn í Eistlandi þar sem Flóra mætir Víkingi í seinni viðureign liðanna í forkeppni Sambandsdeildarinnar. Leikið er á þjóðarleikvangi Eista, Lilleküla vellinum eða A. Le Coq Arena eins og hann heitir eftir styrktaraðila. A. Le Coq er prýðilegur lagerbjór.