Liðin eru að ganga út á völl Þetta fer að detta í gang.

Mikið undir í dag Spjallaði örlítið við Davíð Smára og Ómar áðan. Davíð var mjög gíraður í leikinn og engu líkara en hann væri að senda sína menn á vígvöllinn í dag, býst við því að þeir sjái þetta sem úrslitaleik og gíra sig eftir því.

Ómar var á hinn bóginn yfirvegaður og greinilega með sjálfstraust á sínum mönnum að spila góðan bolta og ná úrslitum þannig í dag. Þannig að þetta verður ef til vil Baráttan vs Fagurfræðin í dag. Sjáum til hvaða nálgun skilar punktunum í dag.

Byrjunarliðin komin inn Ekkert óvænt hjá heimamönnum, Jeppe Pedersen kemur inn í liðið sem og Ibrahima Balde þar sem Silas Songani tekur út leikbann. Hefðbundið 5-4-1 leikkerfi. Benedikt Warén á að dekka vinstri kantinn eins og hann leggur sig. Ibra, Fatai og Gunnar Jónas á miðjunni. Eiga að vera þéttir í dag, það er alveg ljóst.

Hjá gestunum er George Nunn á bekknum, hefur verið þar undanfarið. Atli Hrafn Andrason er í banni, fékk rautt fyrir norðan í síðasta leik. Nafni hans Atli Arnarson leysir hann af. Að öðru leyti er liðið óbreytt frá síðasta leik, enda kannski ekki ástæða til, HK-ingar hafa litið ágætlega út seinni part móts.

Fyrri viðureignir og spáin Liðin gerðu 1-1 jafntefli í Kórnum og þar áður vann Vestri HK í Laugardalnum 1-0. Ekki skemmtilegustu leikir sumarsins en það breytist hér í dag.

Jói Skúli er spámaður umferðarinnar hjá Fótbolta.net:

Vestri 1 - 2 HK (sunnudagur 14:00)

Aftur mjög erfitt. Ég átti nokkur góð samtöl við Davíð Smára þegar hann var skemmtanastjóri á Glaumbar og svo var ég alltaf að segja Ómari Inga að þegja þegar við spiluðum í 3.-4. deild. Það eru samt allir sofandi á því að á sama tíma og Ívar Örn Jónsson var SpaceJammaður þegar kemur að NfL Fantasy (hann er einn sá slakasti) þá er hann farinn að geta tekið aukaspyrnur aftur. Ívar með tvö eins og á móti BÍ/Bol í gamla daga.

Heiðursgestur: Dettur enginn skemmtilegur í hug þannig ég ætla bara að fljúga Ævari Hrafni Ingólfssyni, harðasta Hking landsins, vestur.

HK Gestirnir byrjuðu líkt og Vestri á jafntefli á útivelli eftir tvískiptinguna. 3-3 jafntefli fyrir norðan þar sem HK jöfnuðu undir lokin. Annars hafa þeir verið á fínu róli, unnið Fram og KR heima en tapað úti gegn Blikum og Stjörnunni.

Ómar Ingi þjálfari talaði um það að sér þætti sérkennilegt að Vestri fengi bæði heimaleiki gegn Fylki og HK. Það má í rauninni taka undir það að að það skjóti skökku við að liðið í 11.sæti fái heimaleiki gegn 12. og 10. sætinu en hins vegar hafa Vestramenn einungis unnið einn leik á Kerecisvellinum.

Vestri Vestri eru með 19 stig, tveimur stigum frá öruggu sæti. Unnu síðast 17. ágúst gegn KR en síðan þá hafa komið 2 jafntefli og 2 töp. Það er augljóst að sjá hvar vandamálin liggja hjá þeim en þeir hafa skorað fæst mörk í deildinni en fengið á sig færri en liðin í kring. Síðasti leikur var 2-2 jafntefli við KR eftir að hafa lent undir í tvígang.

Andri Rúnar skoraði í síðasta leik og þeir þurfa á því að halda að hann haldi því áfram.

Staðan Það eru fjögur lið sem geta fallið en tvö af þeim munu á endanum fara niður. Fylkir er í vondum málum 4 stigum frá öruggu sæti, fyrir ofan þá eru Vestramenn í fallsæti tveimur stigum á eftir HK en Vestri fara upp fyrir HK með sigri í dag. Vinni HK hins vegar eru þeir 5 stigum á undan Vestra og komnir í ansi vænlega stöðu.

Velkomin Heil og jafnvel sæl og verið velkomin í beina textalýsingu frá Kerecis-vellinum á Ísafirði en þar mætast Vestri og HK í leik sem hefur gríðarlegt vægi í fallbaráttunni.