SKÝRSLAN: Dramatík, víti og skógarhlaup fyrir vestan
Hvað réði úrslitum?
Vestramenn skoruðu úr fyrstu tveimur skotunum sínum á markið og voru þar komnir í góða forystu. HK-ingar unnu hinsvegar hart að því að koma til baka sem þeir gerðu á 57. mínútu og staðan orðin 2-2. Daði Berg Jónsson skoraði svo á 90. mínútu og ég hélt að Vestramenn væru að klára þetta en á lokamínútu uppbótartíma jafnar Jóhann Þór Arnarsson. Framlengingin var svo nokkuð dauf en vítaspyrnukeppnin fór í bráðabana þar sem Schubert markvörður Vestra varði tvisvar og Jeppe Pedersen skoraði úr lokaspyrnunni.
Bestu leikmenn
1. Benjamin Schubert (Vestri)
Hetjan í vítaspyrnukeppninni og hann fær þá þennan heiður. Hann var ekkert stórfenglegur í leiknum sjálfum en þegar skipti máli þá varði hann vítin.
2. Daði Berg Jónsson (Vestri)
Daði kom inná á 62. mínútu og það sem fylgdi því var strax gæði. Hann var að vinna mjög skemmtilega með Kristoffer Grauberg og svo skoraði Daði markið á 90. mínútu sem flestir héldu að væri sigurmarkið.
Atvikið
Arnar Freyr Ólafsson var að reyna að finna sinn innri Manuel Neuer í þessum leik en það gekk frekar illa. Á 76. mínútu fer hann í svakalegt skógarhlaup þar sem hann endar á að taka Silas Songani niður og hefði átt að fá rautt spjald en var heppinn og fékk bara gult.
Hann fór svo seinna í leiknum aftur í galið skógarhlaup en það var ekki jafn slæmt og það fyrra.
Hvað þýða úrslitin?
Vestramenn fara áfram í bikarnum en eru búnir að spila langan leik með uppbótartíma. HK er dottið úr leik og þarf ekki að pæla í neinu öðru en Lengjudeildinni sem hefst 2. maí.
Vondur dagur
Arnar Freyr Ólafsson eins og ég skrifaði um í atvikinu var í svaka skrítnum úthlaupum. Honum tókst síðan ekki að verja neitt víti í vítaspyrnukeppninni heldur voru klikkin hjá Vestra í slánna og hitt yfir.
Dómarinn - 5
Mér fannst stórskrýtið að gefa Arnari ekki rautt fyrir það sem ég skrifaði um í atvikinu. Það er svo stórt atvik að Gunnar er dreginn töluvert niður í einkunn. Restin af leiknum var nefnilega ágætlega dæmdur.