Spyrnan kemur inn á teiginn sem Gummi Magg sýnist mér skallar á markið en Rosenörn grípur boltann og Twana flautar síðan leikinn af.

Alvöru veisla þessi leikur!

Boltinn dettur inn á teig FH, það myndast mikið klafs inni á teignum og Blikar vilja hendi víti en fá ekkert.

Nægur tími til stefnu en Dóri eitthvað ósáttur með uppbótartímann.

Blikar liggja á FH-ingum á þessa stundina eins og kannski búist var við.

Björn Daníel fær boltann við vítateigslínuna og klárar færið en markið dæmt af, boltinn líklega farinn útaf.

Frábær byrjun á síðari hálfleiknum hjá FH og Blikar eru bara slegnir.

FH líklegri til að bæta við ef eitthvað er.

Blikar verjast þessari spyrnu vel en sóknarpressa FH heldur áfram.

Blikar leiða í hálfleik. FH var ofan á til þess að byrja með og hafa líklega heilt yfir átt fleiri sénsa að skora en Blikar leiða í hálfleik.

Kjartan Kári tekur spyrnuna inn á teiginn sem Anton Ari gerir frábærlega í að kýla frá.

Boltinn fer svo í aðra hornspyrnu en uppbótartíminn var löngu liðinn og Twana gerir bara rétt í að flauta til hálfleiks að mínu mati.

Davíð Ingvarsson er uppalinn í Krikanum og er núna búinn að skora tvö mörk fyrir Breiðablik gegn uppeldisfélaginu. Spurning hvort hann nái að setja þrennu.

Eftir þennan fjöruga markakafla hefur leikurinn aðeins róast finnst manni. Varnarleikur beggja liða ekki verið til útflutnings í fyrri hálfleiknum en báðar varnirnar virðast vera að vinna sig inn í leikinn núna.

Langur bolti upp völlinn sem Sigurður Bjartur skallar með ansi góðum krafti á markið. Anton var staðsettur frekar framarlega í markinu en hann nær að bakka og handsama boltann.

Staðan í skotum í leiknum er Breiðablik 3-6 FH. FH-ingar miklu líklegri að taka forystuna þessar upphafsmínútur.

Frábært spil FH-inga sem endar með skoti Sigurðar við vítateigslínuna á markið sem Anton ver.

Fáranleg sending hjá Ágústi Orra til baka á Anton Ara. Boltinn skoppar við vítateigs línuna og Anton er mættur til þess að hreinsa en Sigurður Bjartur er á undan honum í boltann. Siggi kemst framhjá Antoni og reynir að setja hann í tómt markið en hann var kominn í alltof þröngt færi og setur boltann ofan á þverslána.

Blikar stálheppnir þessar upphafsmínútur.

Kjartan Kári keyrir inn á teiginn og kemur með boltann yfir á Björn Daníel sem tekur skotið á markið en Anton Ari gerir vel í að verja áður en Blikar hreinsa frá.

Birkir Valur keyrir inn á teiginn og kemur með boltann inn á teiginn sem fer beint í lúkurnar á Antoni.

FH hatar að spila á gervigrasi á meðan Blikar elska það. Epic býður okkur upp á stuðulinn 2.20 á að Breiðablik vinnur leikinn, ansi gott value í því ef þú spyrð mig.

Viktor Örn með galna sendingu til baka á Anton sem Kjartan Kári kemst fyrir og setur boltann rétt framhjá. Þetta var ekkert smá nálægt því.

Blikar í hörkusókn og FH-ingar liggja niðri í nauðvörn í rúmlega hálfa mínútu og standa sóknarpressu Blika af sér.

Blikar byrja þetta í dag þegar Twana flautar leikinn í gang.

Góða skemmtun segi ég.

Það eru fimm breytingar á liði Breiðabliks eftir tapið gegn Zrinjski Mostar í forkeppni Evrópudeildarinnar.

Höskuldur Gunnlaugsson, Viktor Karl Einarsson, Óli Valur Ómarsson og Kristinn Jónsson setjast á bekkinn og Valgeir Valgeirsson er ekki í hópnum. Arnór Gauti Jónsson, Kristinn Steindórsson, Aron Bjarnason, Davíð Ingvarsson og Gabríel Snær Hallsson koma inn í liðið.

Dagur Örn Fjeldsted og Einar Karl Ingvarsson detta út úr liði FH eftir sigur gegn ÍA í síðustu umferð. Tómas Orri Róbertsson og Kristján Flóki Finnbogason koma inn í liðið. Heimir Guðjónsson tekur út leikbann og Kjartan Henry Finnbogason stýrir því liðinu í kvöld.

Einar Freyr Halldórsson, leikmaður Þórs í Lengjudeildinni, er spámaður umferðarinnar í Bestu deildinni. Hann spáir nokkuð öruggum heimasigri.

Breiðablik 3 - 1 FH (19:15 í dag)
Blikar komast 2-0 yfir snemma, Sigurður Bjartur minnkar muninn en Ágúst Orri klárar þetta fyrir Blikana.

Twana Khalid Ahmed er dómari leiksins í dag.

Bergur Daði Ágústsson og Antoníus Bjarki Halldórsson aðstoða hann og Þorfinnur Gústaf Þorfinsson er skiltadómari. Oddur Helgi Guðmundsson er eftirlitsmaður KSÍ.

Breiðablik er fyrir leiki kvöldsins í 3. sæti, með jafnmörg stig og Víkingur í 2. sætinu og fimm stigum frá toppliði Vals. Stjarnan er svo stigi á eftir í 4. sætinu eftir sigurinn gegn Vestra fyrr í dag.

FH er í 8. sæti með 22 stig, þremur stigum minna en Fram í 6. sætinu en með betri markatölu og getur því komist upp í efri hlutann með sigri. ÍBV er í 7. sætinu með 24 stig eftir sigurinn á Val í dag. FH er tveimur stigum frá fallsæti og sex stigum fyrir ofan botnlið ÍA fyrir leiki dagsins.

Breiðablik tapaði 1-2 gegn Zrinjski Mostar á fimmtudag og féll með því úr leik í forkeppni Evrópudeildarinnar. Breiðablik mun spila í umspili um sæti í Sambandsdeildi næstu tvo fimmtudaga. Liðið mætir þar AC Virtus frá San Marínó. Breiðablik tapaði líka 2-1 síðasta sunnudag þegar liðið mætti Val.

FH vann 3-2 endurkomusigur gegn ÍA síðasta sunnudag. Sigurður Bjartur Hallsson (2) og Ísak Óli Ólafsson skoruðu mörk FH í þeim leik. Heimir Guðjónsson fékk að líta rauða spjaldið í fyrri hálfleik og verður því í leikbanni í dag.

Fyrri leikur þessara liða endaði með 2-0 sigri FH í Kaplakrika.

FH hefur til þessa ekki sótt eitt einasta stig á gervigrasi, og það er gervigras á Kópavogsvelli.

Gestirnir úr Hafnarfirði sjá tækifæri í því að komast upp í efri hlutann með sigri. Blikar sjá svo dauðafæri á því að komast nær toppliði Vals. Munurinn á liðunum eru fimm stig, en Valsarar töpuðu gegn ÍBV í Eyjum í dag.

Góða kvöldið lesendur góðir og veriði velkomnir á leik Breiðabliks og FH í 19. umferð Bestu deildarinnar.

Leikurinn hefst klukkan 19:15 og fer fram á Kópavogsvelli, heimavelli Breiðabliks.