SKÝRSLAN: Tileinkaði móður sinni markið á eftirminnilegu kvöldi
Hvað réði úrslitum?
Selfoss var með öll völd á vellinum frá upphafi til enda. Árborg náði aldrei að ógna marki Selfoss af alvöru og leikurinn fór að mestu leyti fram á vallarhelmingi gestanna.
Bestu leikmenn
1. Aron Fannar Birgisson
Aron Fannar fær þetta frá mér. Hann kom inn á sem varamaður í hálfleik og það lá nánast í loftinu að hann myndi skora í þessum leik. Það gerði hann síðan með skalla eftir hornspyrnu og átti afar tilfinningaríkt augnablik þegar hann fagnaði markinu með Selfoss-treyju merkta móður sinni.
2. Viðar Örn Kjartansson
VÖK átti frábæran leik, skoraði tvö mörk og lagði upp eitt. Hann hefði jafnvel getað fullkomnað þrennuna en fór illa með vítaspyrnu.
Atvikið
Atvik leiksins átti sér stað á 79. mínútu þegar Aron Fannar skoraði með skalla eftir hornspyrnu og tileinkaði markið móður sinni, Helgu Guðmundsdóttur, sem lést á dögunum eftir baráttu við krabbamein. Það var einstaklega tilfinningaríkt augnablik á JÁVERK-vellinum.
Hvað þýða úrslitin?
Selfoss er komið áfram í átta liða úrslit Fótbolta.net bikarsins. Sigurinn ætti jafnframt að gefa liðinu aukið sjálfstraust fyrir komandi verkefni í deildinni.
Vondur dagur
Ef ég ætti að nefna einn leikmann væri það Stefán Blær. Hann var reglulega í basli í leiknum og fór út í misheppnað úthlaup þar sem hann fékk boltann yfir sig. Í kjölfarið kom vítaspyrnan sem Selfoss reyndar klikkaði á. Þá hefði hann einnig mögulega getað komið í veg fyrir eitt til tvö mörk.
Dómarinn - 9
Gunnar Oddur dæmdi þennan leik fáránlega vel ekkert út á hann að setja engin vafa atriði og leyfði leiknum að fljóta vel!