SKÝRSLAN: Markaregn í rigningunni þegar Ída Marín sökkti Þrótturum
Hvað réði úrslitum?
Ída Marín Hermannsdóttir réði baggamuninn í þessum leik. FH liðið var auðvitað betra liðið á vellinum heilt yfir og áttu sigurinn skilið en þessi frammistaða Ídu Marínar var rosaleg
Bestu leikmenn
1. Ída Marín Hermannsdóttir (FH)
Lék á als oddi og var á góðri íslensku gjörsamlega unplayable. Skorar þrennu á fjórum mínútum í fyrri hálfleik og bætir við tveimur í viðbót í þeim seinni. Er orðuð við atvinnumennsku þessa dagana en það er bara spurning um hvenær en ekki hvort hún fer út.
2. Thelma Lóa Hermannsdóttir (FH)
Svo markar úr FH sem ég gæti sett í þennan dálk en ég set systurnar hér saman. Mér finnst alltaf eins og það séu tvær Thelmur á vellinum þegar ég horfi á FH og alltaf eitthvað í gangi í kring um hana. Var að koma liðsfélögum sínum í góðar stöður allan leikinn og náði að leggja upp á systur sína. Hafrún Birna hefði auðveldlega getað verið í þessum dálki en sú var spræk í dag.
Atvikið
Þrennan frá Ídu Marín í fyrri hálfleik. Þróttur komst í 2-0 og var að gera sitt ágætlega en þá ákvað Ída að nóg væri komið og tók málin í sínar eigin hendur. FH voru búnar að vera sterkari aðilinn þrátt fyrir að hafa lent undir og á þessum fjórum mínútum brast stíflan.
Hvað þýða úrslitin?
FH taka sér sæti á toppnum þar sem Blikar töpuðu sínum leik og eru komnar í 23 stig. Þróttarar eru áfram í miðjumoðinu og halda 5. sætinu þar sem liðin fyrir neðan þær töpuðu líka en markatalan tók á sig smá högg.
Vondur dagur
Miðverðir Þróttar áttu alveg ofboðslega erfiðan dag á skrifstofunni. Ída Marín sneri þeim hring eftir hring og ég væri ekki hissa þó að þær hafi farið hálfringlaðar inn í klefa eftir leik.
Dómarinn - 8
Ég varð lítið vör við Arnar Inga og hans teymi sem er eiginlega stærsta hrós sem ég get gefið. Ekkert sérstaklega erfiður leikur að dæma en gerði vel þegar hann þurfti að stíga inn í en var ekkert að flauta að óþörfu.