SKÝRSLAN: Framarar jafna KR að stigum
Hvað réði úrslitum?
Baráttan og ákefðin í Fram var upp á tíu í kvöld. Þeir nýttu einnig færin mjög vel og unnu verðskuldað. Stjörnumenn fengu sínar stöður en voru óheppnir þar sem þeir skutu tvisvar í slá og einu sinni í stöng. Þegar þeir fengu þriðja markið á sig lögðu þeir árar í bát.
Bestu leikmenn
1. Róbert Hauksson
Róbert þakkaði svo sannarlega traustið í kvöld og setti tvö. Annað markið var ákaflega laglegt eftir frábært "flikk" frá Vuk.
2. Vuk Oskar Dimitrijevic
Vuk var mjög góður í kvöld, hann var með tvær frábærar stoðsendingar og hélt oft á köflum vel í boltann.
Atvikið
Þetta þriðja mark sem Már Ægisson skoraði. Það gerði út um leikinn og Stjörnumenn sáu ekki til sólar eftir það.
Hvað þýða úrslitin?
Úrslitin þýða að Fram eru búnir að jafna KR að stigum en KR-ingar eru með betri markatölu. Stjörnumenn sitja ennþá í 9. sæti deildarinnar með 21 stig og gætu sogast í fallbaráttuna.
Vondur dagur
Það var enginn sem átti vondan dag í kvöld. Mörk Fram voru úr efstu hillu og ekkert mikið sem Stjörnumenn hefðu getað gert í þeim.
Dómarinn - 7
Sigurður Hjörtur og hans teymi voru flottir í kvöld.