Líklegt byrjunarlið Íslands - Arnar vill breyta sem minnstu

„Mér finnst bara allir þessir strákar í hópnum geta startað leikinn. Auðvitað viltu breyta sem minnstu eftir 5-0 sigur gegn Búlgaríu en við erum neyddir til að gera tvær breytingar," sagði Arnar á fréttamannafundi í dag.

Arnar var virkilega ánægður með Búlgaríuleikinn. Við giskum því á að breytingarnar á byrjunarliðinu verði aðeins tvær.

Aron Einar byrjar á bekknum
Spurning er hver verður í miðverði í stað Stefáns á morgun. Hörður Björgvin Magnússon, sem kom inn fyrir hann í Búlgaríu, verður í leikbanni.

Miðað við ummæli Arnars á fréttamannafundinum í dag er útlit fyrir að Aron Einar Gunnarsson byrji á bekknum í sínu síðasta landsleikjaverkefni. Hjörtur Hermannsson og Brynjar Ingi Bjarnason voru kallaðir inn í hópinn og þá er möguleiki á að nota Guðlaug Victor Pálsson í hjarta varnarinnar.

Fótbolti.net spáir því að Hjörtur komi inn í byrjunarliðið.

Arnór Sigurðsson var valinn framyfir Jón Dag Þorsteinsson þegar Kristall meiddist í Búlgaríu og er Arnór því í líklegu byrjunarliði.

Jafntefli dugar Íslandi til að vinna riðilinn vegna öflugrar markatölu og þá er ljóst að Ísland endar alltaf í efsta sæti ef Eistland vinnur ekki Búlgaríu í leik sem fram fer á sama tíma. Það er mikilvægt fyrir Ísland að sigra á morgun af fleiri ástæðum en bara að tryggja sér upp í B-deild. Með því að vinna riðilinn verðum við í þriðja styrkleikaflokki þegar dregið verður í undankeppni EM í byrjun desember og sigur styrkir stöðu okkar þegar kemur að möguleika á bakdyraleið á EM ef við náum ekki sæti í gengnum undankeppnina.