Marco Materazzi, fyrrum landsliðsmiðvörður Ítalíu og núverandi spilandi þjálfari hjá indverska liðinu Chennaiyin, er mjög hrifinn af íslenska landsliðinu og þeim uppgangi sem Lars Lagerback hefur átt stóran þátt í þar á bæ.
Hann segir sigur Íslands gegn Hollandi í gærkvöldi frábært afrek og að Lagerback hafi sýnt hversu góður hann sé í sínu fagi.
,,Ef maður nær níu stigum í þremur leikjum sem þjálfari Íslands, er ljóst að maður er mjög góður þjálfari,” sagði Materazzi í samtali við Expressen.
Magnús Agnar Magnússon, umboðsmaður hjá TotalFootball, sagði við sænska fjölmiðla í gærkvöldi að Lagerback ætti að verða næsti forseti Íslands. Aðspurður tekur Materazzi í sama streng.
,,Ég veit, mér finnst það líka. Hann verðskuldar að verða forseti, þeir hafa fullt hús stiga,” sagði Materazzi og reyndi auk þess að hughreysta Hollendinga ögn lítið.
,,Ég tapaði fyrir Íslandi í fyrsta leiknum sem Marcello Lippi stýrði ítalska landsliðinu en síðan urðum við heimsmeistarar. Svona er fótboltinn.”
Athugasemdir