„Mér fannst við byrja seinni hálfleikinn gríðarlega vel og hafa öll tökin í upphafi seinni hálfleiks. Erum að skapa færi og svo er dæmt rangstöðumark af okkur sem var svekkjandi, við verðum að sjá hvort það hafi verið rétt," sagði Sverrir Ingi Ingason miðvörður Íslands eftir 3-1 tap í Slóvakíu í kvöld.
Lestu um leikinn: Slóvakía U21 3 - 1 Ísland
„Svo kemur ein stungusending innfyrir og Ömmi er kominn með boltann í hendurnar þegar hann sparkar boltanum úr höndunum á honum og þeir jafna leikinn. Eftir það missum við aðeins dampinn og það slitnar á milli lína hjá okkur sem var búin að vera sterk í fyrri hálfleik. Þeir voru ekki að ná að skapa sér neitt og hann fær skotfæri og klínir honum inn í vinkilinn."
„Eftir það fannst mér við vinna okkur vel inn í leikinn og hefðum getað jafnað, en svo þegar við fórum að setja auka pressu á að jafna leikinn ná þeir þriðja markinu sem mér fannst svekkjandi því mér fannst við spila nokkuð vel og hefðum við nýtt færin okkar í dag áður en þeir jafna held ég að við hefðum getað gert út um leikinn."
Sverrir vill meina að brotið hafi verið á Ögmundi þegar Slóvakar jöfnuðu metin en hann var við það að handsama boltann.
„Ömmi er kominn með boltann í hendurnar þegar hann sparkar í hendurnar á honum og hann missir boltann. Hann þarf að fara í gegnum mig og teyja sig í boltann, þetta var pjúra aukaspyrna en við fengum það ekki með okkur í dag og það var svekkjandi."
Nánar er rætt við hann í sjónvarpinu að ofan.
Athugasemdir