„Þetta er allt öðruvísi en önnur HM þar sem þú horfir á alla leiki með athygli," sagði Hannes Þór Halldórsson, landsliðsmarkvörður á fréttamannafundi í dag aðspurður hvort að leikmenn íslenska landsliðsins nái að horfa á aðra leiki á HM í Rússlandi.
„Ég veit varla hverjir eru að spila og hvað er í gangi fyrir utan okkar leiki. Við erum mjög einbeittir að okkar verkefni. Leikirnir eru í gangi en þetta er ekki eins og venjulega HM þar sem þú situr heima í sófanum og horfir á alla leiki."
Alfreð Finnbogason virðist sjá aðeins meira af leikjunum en Hannes.
„Leikirnir eru alltaf í gangi í sjúkraþjálfaraherberginu og fundarherberginu svo þú sérð mikið hvað er í gangi í hinum leikjunum. Aðaleinbeitingin er hins vegar á okkur sjálfa," sagði Alfreð.
Alfreð og Hannes verða í eldlínunni með íslenska landsliðinu á föstudaginn þegar liðið mætir Nígeríu í Volgograd.
Athugasemdir