„Þetta var ógeðslega svekkjandi," sagði Halldór Jón Sigurðsson, Donni, þjálfari Þórs/KA eftir að liðinu mistókst að tryggja sér Íslandsmeistaratitilinn í dag með 3-2 tapi í Grindavík.
Lestu um leikinn: Grindavík 3 - 2 Þór/KA
„Þetta var leikur þar sem þetta datt ekki alveg með okkur. Við eigum skot í slánna og niður á línu og þær fara upp og skora. En við hefðum getað gert betur í dag. Grindavík stóð sig vel, nýttu sína styrkleika vel og sóttu hratt."
Donni vildi ekki spila leikinn í rokinu og rigningunni í Grindavík í dag en aðstæður þóttu nógu góðar til að spila leikinn.
„Auðvitað átti ekki að spila," sagði hann. „Það skiptir samt engu máli, það voru bæði lið að spila á sama velli á sama tíma svo það skiptir engu máli," sagði Donni en þrátt fyrir rok var það ekki það mikið að vindurinn virtist aldrei stela boltanum.
„Það sást kannski utan frá en sást þegar maður labbar yfir völlinn að það voru pollar á honum. Það skipti engu helvítis máli hvernig aðstæður voru. Við hefðum bara átt að gera betur."
Þór/KA mætir FH á fimmtudaginn og getur unnið titilinn í lokaumferðinni með sigri þar, ef ekki gæti Breiðablik stolið honum með því að vinna Grindavík heima.
„Við eigum úrslitaleik eftir, Breiðablik þarf að klára sinn leik en við ætlum að einbeita okkur að því að vinna okkar leik og sigla þessu heim fyrir vonandi 3000 manns. FH er besta liðið i neðri hluta deildarinnar, einn erfiðasti leikur sem við höfum spilað var á þeirra heimavelli. Við tökum vel á móti þeim á okkar velli og það verður ekkert gefins í þeim leik."
Athugasemdir