AC Milan fór illa að ráði sínu gegn neðsta liði ítölsku A-deildarinnar, Hellas Verona. Frakkinn Jeremy Menez sá til þess að Milan var yfir í hálfleik en í þeim síðari skoruðu heimamenn tvívegis og tryggðu sér þrjú stig.

Giampaolo Pazzini jafnaði í 1-1 en hann gekk í raðir Verona frá AC Milan í fyrra. Það var svo í uppbótartíma sem Luca Siligardi skoraði sigurmarkið.

Gianluigi Donnarumma, markvörðurinn ungi hjá Milan, hafði í nægu að snúast í leiknum og varði oft meistaralega en náði ekki að koma í veg fyrir niðurlægjandi ósigur.

AC Milan er í sjötta sæti og missti af mikilvægum stigum í baráttu um Evrópusæti. Verona er neðst með 25 stig og ljóst að B-deildin bíður næsta tímabil.