Ingimundir Níels Óskarsson braut ísinn á 80. mínútu áður en Emil Pálsson bætti við öðru marki undir lok leiksins.

,,Það var gott vinnuframlag og gott skipulag, við héldum markinu hreinu og skoruðum tvö góð mörk. Þetta var þolinmæðisvinna og við sýndum það í þessum leik," sagði Heimir.

,,Þeir komu inn, Shawn og Brynjar, mér fannst þeir standa sig virkilega vel. Varnarleikur liðsins í heildinni var góður og Fylkir var ekki að skapa sér mörg færi í þessum leik."

Steven Lennon spilaði sinn fyrsta leik fyrir FH í dag en hann samdi við liðið eftir að hafa komið frá Sandnes Ulf.

,,Ekki spurning, við vitum að Lennon er mjög góður leikmaður og á eftir að nýtast FH-liðinu mjög vel. Hann kom inn í leikinn og stóð sig vel."

,,Mér fannst við ekki í vandræðum, við vorum að skapa góð færi en hefðum mátt vera nákvæmari upp við markið en þeir komu inn, Lennon og Atli Guðna, þeir eru sóknarþenkjandi menn og Ingimundur náði að brjóta ísinn fyrir okkur."

,,Já, það er alltaf gaman að spila Evrópuleiki og Elfsborg er mjög gott lið og við þurfum að spila virkilega góðan leik á fimmtudaginn á erfiðum útivelli og ná hagstæðum úrslitum svo að það verði einhver stemmning í Krikanum í seinni leiknum."

FH hefur verið í viðræðum við Val um kaup á Indriða Áka Þorlákssyni en Heimir vill ólmur fá hann í raðir félagsins.

,,Við erum búnir að tala við hann eða klúbbarnir eru búnir að tala saman. Ég skipti mér ekki af því en við höfum áhuga á að fá hann en ég veit ekki hver staðan er á því í dag," sagði Heimir að lokum.

Hægt er að sjá viðtalið í heild sinni hér fyrir ofan.