SKÝRSLAN: Góð byrjun Framara skipti sköpum
Hvað réði úrslitum?
Einbeytingarleysi Þórsara í tvígang snemma leiks gerði Frömurum kleyft að skora tvö góð mörk. Ég tek þó ekkert af þeim og þeir náðu að opna vörn Þórsara þónokkrum sinnum í fyrri hálfleik sem beittum sóknarleik og fljótum framherjum.
Bestu leikmenn
1. Indriði Áki Þorláksson (Fram)
Ógnaði sífellt með hraða sínum og krafti. Var beittur fram á við og lagði upp bæði mörk Framara.
2. Gunnlaugur Hlynur Birgisson (Fram)
Stjórnaði miðjunni eins og kóngur og var góður bæði fram á við og til baka. Orri Gunnarsson á einnig heima hér og var hætti aldrei að hlaupa.
Atvikið
Mark Orra Gunnarssonar eftir 24 sekúndur mótaði þennan leik. Þórsarar höfðu byrjað leikinn og geystust upp í sókn og virtust ætla að pressa Framara hátt. Þegar dæmd var hins vegar aukaspyrna á þá innan teigs Framara virtust menn vera komnir út úr stöðum sem Framarar nýttu sér með góðri skyndisókn sem endaði með sendingu Indriða Áka út í teiginn á Orra sem lagði boltann í þaknetið.
Hvað þýða úrslitin?
Framarar komast aftur á beinu brautina eftir slakt gengi þar sem þeir voru komnir fullnálægt botnsvæðinu fyrir þeirra smekk. Þórsarar virðast hins vegar endanlega vera að kveðja toppbaráttuna með sínu fimmta tapi í röð.
Vondur dagur
Jóhann Helgi Hannesson, framherji Þórsara, náði á einhvern ótrúlegan hátt að klúðra tveimur dauðafærum á innan við mínútu í fyrri hálfleik. Þar að auki braut hann af sér 5-6 sinnum og fékk að lokum gult spjald. Leikur sem hann vill líklega gleyma í bráð.
Dómarinn - 6
Rauðu spjöldin virtust bæði vera réttir dómar og almennt séð stóð Jóhann Ingi sig svo sem ágætlega. Línan sem hann dró var samt óskýr á köflum en hallaði þó tæplega á annaðhvort liðið.