SKÝRSLAN: Stórmeistarajafntefli í kaldri Austangolunni
Hvað réði úrslitum?
Vindurinn. Köld golan niður af Eskiðifjarðarheiði hafði mikil áhrif á hvernig leikurinn spilaðist og átti þátt í öllum fjórum mörkum leiksins.
Bestu leikmenn
1. Víkingur Pálmason
Skoraði eitt og lagði upp annað. Leiknis menn áttu engin svör við aukaspyrnum hans en þær voru gríðarlega vel útfærðar og Víkingur nýtti sér vindinn vel. Víkingur var einnig frískur á kantinum í fyrri hálfleik og fyrirgjafir hans sköpuðu mikla hættu. Það að Fjarðabyggð spilaði á móti vind í seinni hálfleik olli því að minna sást til hans þegar leið á leikinn.
2. Andres Salas Trenas og Hilmar Freyr Bjartþórsson
Andres Trenas var eins og klettur í vörn Leiknis og lagði upp mikilvægt jöfnunarmark þeirra.
Hilmar Freyr átti einnig mjög góðan seinni hálfleik. Hann lagði upp fyrra mark Leiknis fyrir Jesus Suarez og átti síðan sendinguna sem Andres Trenas flikkaði áfram í seinnna marki Leiknis.
Atvikið
Það var lítið um stór atvik í þessum leik. Helst ber að nefna dómarakastið þar sem að Fjarðabyggð fékk að byrja með vind í fyrri hálfleik. Fyrirliði Leiknis, Björgvin Stéfan, hafði lofað blóðugri baráttu fyrir leik en það skilaði sér svo sannarlega ekki.
Hvað þýða úrslitin?
Fjarðabyggð missir bæði HK og Hauka fram úr sér í deildinni. Ef Huginn vinnur sinn leik þýðir það að Fjarðabyggð verður aðeins tveimur stigum fyrir ofan fallsæti.
Leiknir verður áfram á botni deildarinnar nema að Huginn tapi sínum leik. Þeir fjarlægast öruggt sæti enn meira í ljósi þess að bæði HK og Haukar unnu sína leiki.
Vondur dagur
Það átti í raun enginn slæman dag og erfitt að kenna leikmönnum liðanna um mörkinn vegna þess hversu erfiðar aðstæðurnar voru.
Dómarinn - 8
Tómas Orri átti flottann leik. Það bar ekki mikið á honum, lét ekki blekkjast þegar leikmenn dýfðu sér og allar stærri ákvarðanir hans virtust réttar.