Leikur með fáum marktækifærum. Fín úrslit fyrir Valsmenn fyrir síðari leikinn á gervigrasinu á Hlíðarenda í næstu viku.

Þrjár mínútur í viðbótartíma.

Dion Acoff með skot í varnarmann og aftur fyrir endamörk. Hornspyrna.

Rólegt yfir þessu núna. Valsmenn sækja ekki á mjög mörgum mönnum í augnablikinu. Sáttir með stöðuna.

Paulius á skot eftir fyrirgjöf en Orri Sigurður Ómarsson nær að henda sér fyrir það. Vel gert hjá Orra.

Haukur Páll Sigurðsson liggur meiddur á vellinum. Einar Óli Þorvarðarson, sjúkraþjálfari Vals, hugar að meiðslum hans. Haukur Páll heldur síðan áfram leik.

Valsmenn taka löng innköst við öll tækifæri. Sigurður Egill tekur þau vinstra megin og Arnar Sveinn hægra megin.

Valsmenn sækja stíft núna. Skemmtilega útfærð aukaspyrna sem Bjarni Ólafur skallar inn í pakkann. Ventspils nær að bjarga.

Valsmenn nálægt því að skora! Sigurður Egill fær langa sendingu og skallar boltann áfram. Kristinn Ingi hefur betur í baráttu við varnarmann og á skot en Pavlovs kemur út á móti og ver. Pavlovs var nánast alveg ofan í Kristni þegar hann náði loksins skotinu.

Vitalijs Recickis með skot fyrir utan teig en boltinn fer yfir markið.

Eiður Aron með skalla hárfínt yfir markið eftir hornspyrnu frá Einari Karli. Besta tilraun Vals!

Einar Karl Ingvarsson fær boltann fyrir utan vítateig og tekur viðstöðulaust skot. Skotið er fast en yfir markið.

Sigurður Egill fellur í teignum eftir baráttu við varnarmann. Ekkert dæmt. Líklega rétt. Hefði verið harður dómur að dæma víti þarna. Þetta var gamla góða öxl í öxl.

Síðari hálfleikurinn er hafinn!

Nokkuð tíðindalítil fyrri hálfleikur að baki. Heimamenn þó öllu líklegri. Valsmenn eflaust sáttir með stöðuna.

@fkventspils_ - @valursport - 0:0 HT pic.twitter.com/NRKocSCgGg

— FK Ventspils (@fkventspils_) June 29, 2017

Eduards Tidenbergs á skot eftir hornspyrnu en Orri Sigurður Ómarsson kemst fyrir það.

Dion Acoff er í kapphlaupi við varnarmann Nikit Kolesovs nálægt miðlínu. Dion ætlar að skalla boltann áfram og sleppa í gegn þegar Kolesovs sparkar bæði í boltann og hausinn á Dion. Ekkert dæmt við litla hrifningu Valsmanna.

Ventspils fær þrjár hornspyrnur í röð en Valsmenn standa alla storma af sér.

Nikola Boranijasevic á skot af 25 metra færi en Anton ver örugglega.

Sigurður Egill með hættulega sendingu af vinstri kantinum en Andrejs Pavlovs nær að handsama boltann rétt áður en Kristinn Ingi og Dion ná til hans.

Besta færi leiksins! Eftir fyrirgjöf dettur boltinn fyrir fætur Aiyegun Tosin nálægt vítateigslínunni. Hann er einn og óvaldaður og á skot en boltinn fer framhjá markinu.

Langt innkast frá Arnari Sveini skapar hættu á teignum. Eiður Aron nær á endanum skotinu en það fer talsvert framhjá markinu.

Ritvars Rugins liggur sárþjáður á vellinum eftir að hafa fengið skot í höfuðið af hálfs meters færi. Leikurinn er stöðvaður á meðan hugað er að meiðslum hans.

Sigurður Egill bjargar á línu eftir að Antons Jemelins átti skot sem kom í kjölfarið á hornspyrnu hjá Ventspils.

Ventspils hefur sótt meira síðustu mínútur.

Bæði lið búin að fá hornspyrnu snemma leiks. Ekkert kom út úr þeim.

Leikurinn er hafinn!

Ventspils er líklegri aðilinn samkvæmt veðbönkum.

2,20 er stuðullinn á heimasigur en stuðullinn á sigur Vals er 3,20. Stuðullinn á jafntefli er 3,30.

Töluverður hliðarvindur er á vellinum og þurrt.

11 stuðningsmenn Vals eru staddir á leiknum í Lettlandi. Valsfáninn er síðan á áberandi stað í stuðningsmannahólfi Vals.

Heimamenn búast við 1800 manns á leiknum í dag en ekki nema 400 áhorfendur eru mættir í stúkuna þegar tíu mínútur eru í leik.

Tuttugu stiga hiti er á heimavelli Ventspils í dag en leikvangurinn tekur 3200 áhorfendur í sæti.

Ventspils er í sjötta sæti af sjö liðum í lettnesku úrvalsdeildinni en liðið hefur einungis unnið tvo leiki af ellefu á þessu tímabili og valdið vonbrigðum.

Ventspils stillir upp í 3-4-3 samkvæmt uppstillingu uefa.com. Langflestir leikmenn liðsins eru frá Lettlandi auk þess sem nígerísku leikmennirnir Abdullahi Alfa og Aiyegun Tosin byrja báðir. Landi þeirra Adeleke Akinola Akinyemi er á bekknum. Tosin er aðalmarkaskorari Ventspils en hann hefur skorað fimm mörk á tímabilinu.

Sindri Björnsson kemur inn í byrjunarlið Vals fyrir Guðjón Pétur Lýðsson. Sindri hefur einungis leikið þrjá leiki á tímabilinu hingað til en hann fær sénsinn í dag.

Bjarni Ólafur Eiríksson var í banni í síðasta leik gegn Fjölni en hann snýr aftur í liðið á kostnað Rasmus Christiansen. Að öðru leyti er sama lið hjá Val og gegn Fjölni.

Englendingurinn Paul Ashworth þjálfar Ventspils en hann hefur þjálfað meira og minna í Lettlandi frá aldamótum.

Valur tapaði samanlagt 10-1 gegn Bröndby í Evrópudeildinni í fyrra en möguleikarnir ættu að vera talsvert betri gegn Ventspils.

Haukur Páll Sigurðsson, fyrirliði Vals
Ég held að möguleikarnir séu ágætir. Við erum aðeins búnir að skoða þetta lið. Þetta virðist vera mjög vinnusamt lið sem gefur fá færi á sér. Þeir eru öflugir en skora lítið. Liðið hefur verið í Evrópukeppi samfleytt frá 1999 og hefur einu sinni farið í riðlakeppnina. Þetta er lið sem veit hvað það er að gera í þessari keppni. Þetta verður erfiður leikur en við eigum klárlega möguleika.

Valsmenn fóru til Lettlands á sunnudaginn til að komast þangað í beinu flugi. Þeir hafa því fengið góðan tíma til undirbúnings.

Gleðilegan Evrópudag!
Hér verður fylgst með leik Ventspils og Vals í 1. umferð Evrópudeildarinnar.

Fyrri leikurinn fer fram í Ventpsils í Lettlandi en sá síðari er á Valsvelli eftir viku.

Textalýsingin verður með aðeins minna sniði vegna tæknimála en við erum þó í beinu sambandi við mömmu sem er á vellinum í Ventspils.