SKÝRSLAN: Andri Rúnar skoraði ekki í tapleik gegn KA
Hvað réði úrslitum?
Varnarmistök. Eins og Óli Stefán þjálfari Grindavíkur benti á í viðtali þá koma bæði mörk KA-manna eftir varnarmistök. Það var varla færi í leiknum fyrir utan mörkin.
Bestu leikmenn
1. Emil Lyng
Þetta er ótrúlega erfitt val. Emil var sívinnandi allan leikinn og skoraði fyrra mark KA-manna, ásamt því að leggja upp það seinna. Flottur leikur hjá honum.
2. Hallgrímur Mar Steingrímsson
Gæti skrifað nánast það sama og hjá Emil. Mikil vinnsla í Hallgrími allan leikinn og skoraði mark. Frábær á boltanum og duglegur að reyna að búa til.
Atvikið
Ekkert sem stendur neitt rosalega upp úr en ég ætla að velja færið sem Andri Rúnar fékk á lokamínútu uppbótartímans. Slapp innfyrir vörn KA-manna og var í fínu færi en hamraði boltanum hátt yfir markið. Skrifað í skýin að hann myndi jafna markametið á lokamínútu leiksins en það gekk ekki eftir.
Hvað þýða úrslitin?
KA-menn lyftu sér upp fyrir Grindvíkinga og sitja því í 5.sætinu. Grindavík er í 6.sætinu stigi á eftir.
Vondur dagur
Andri Rúnar Bjarnason. Það gekk ekkert upp hjá Andra í dag. Þetta var bara ekki dagurinn hans. Fékk úr litlu að moða en þegar tækifærin gáfust nýtti hann þau illa.
Dómarinn - 9,5
Virkilega vel dæmt hjá Einari Inga í dag. Leikurinn fékk að fljóta vel og vítaspyrnan og gulu spjöldin voru allt hárréttir dómar. Vel gert!