SKÝRSLAN: Löng Helgi í Víkinni
Hvað réði úrslitum?
Heimamenn í Víkingi voru klárlega sterkari aðilinn í leiknum og fengu mun fleiri færi til að skora. Það þurfti hins vegar vítaspyrnumark frá Nikolaj Hansen í uppbótartíma til að tryggja heimamönnum stigin þrjú og áframhaldandi titilbaráttu. Sanngjarn sigur en mátti ekki tæpara standa, enn og aftur stelur dómarinn Helgi Mikael Jónasson fyrirsögnunum með umdeildri ákvörðun - en Víkingar geta nú mögulega fyrirgefið honum það að hafa rekið þrjá leikmenn af velli gegn KR í fyrra.
Bestu leikmenn
1. Árni Marinó Einarsson
Það kann að hljóma undarlega að velja markvörð tapliðsins sem mann leiksins - en Árni er sá eini sem kom til greina. Hann var gjörsamlega frábær á milli stanganna, varði oft vel og greip vel inn í fyrirgjafir. Hann hefði sjálfsagt viljað kóróna frábæran leik með því að verja vítaspyrnuna, en það er ekki við hann að sakast að leikurinn tapaði. Það var honum að þakka að hann tapaðist ekki fyrr.
2. Pablo Punyed
Pablo var ótrúlega öflugur á miðju Víkinga, hljóp eins og berserkur og skilaði boltanum oft afar vel frá sér. Virkilega góð frammistaða frá honum.
Atvikið
Ekki er hægt að velja annað atvik en hinn umdeilda vítaspyrnudóm Helga Mikaels Jónassonar í uppbótartíma. Í fyrstu virtist hann gefa bendingu um að leikur héldi áfram en eftir að sókn Víkings flosnaði upp skipti hann um skoðun, flautaði og benti á vítapunktinn við litla hrifningu Skagamanna. Undirritaður þyrfti að sjá dóminn aftur til að leggja mat á réttmæti ákvarðarinnar, en vítaspyrnan tryggði Víkingi 1-0 sigur.
Hvað þýða úrslitin?
Þökk sé sigrinum er Víkingur enn í bullandi titilbaráttu þrátt fyrir dræma uppskeru undanfarinna leikja. Lærisveinar Arnars Gunnlaugssonar eru komnir með 22 stig, jafnir Breiðabliki og einungis fimm stigum frá toppliði Vals og með leik til góða í þokkabót. Skagamenn sitja hins vegar enn á botni deildarinnar með sex stig og hefði stigið svo sannarlega verið vel þegið, þótt helst hefðu þau þurft að vera þrjú. Liðið er enn fimm stigum frá öruggu sæti.
Vondur dagur
Erlingur Agnarsson átti ansi erfiðan dag fyrir framan mark Skagamanna og er með hreinum ólíkindum að hann hafi ekki náð að skora - hann hefði í rauninni getað gert þrennu. Í fyrri háflleik varð slæm móttaka honum að falli einum á móti markmanni og í seinni hálfleik fór hann illa með gott skallafæri og annað gott færi. Erlingur hefði sjálfsagt átt erfitt með svefn ef heimamenn hefðu ekki náð að kreista fram sigur í kvöld - en sefur sjálfsagt eins og engill þökk sé stigunum þremur.
Dómarinn - 6
Helgi Mikael átti að mörgu leyti mjög flottan leik í kvöld. Ástæðan fyrir sexunni er ruglingurinn í kringum vítaspyrnuna. Undirritaður á erfitt með að fullyrða að þetta hafi verið rangur dómur, en hins vegar var klárt mál að Helgi gaf merki um að ekkert brot hefði átt sér stað og skipti síðan um skoðun - og bersýnilega ekki vegna þess að hann hefði viljað gefa Víkingi hagnað. Einkar furðulegt atvik og augljóslega mjög dýrkeypt fyrir Skagamenn.