SKÝRSLAN: Enn og aftur mistekst Þórsurum að skora
Hvað réði úrslitum?
Vestri fengu fleiri færi og náðu að koma tveimur þeirra í netið. Eins og taflan sýnir eru Vestramenn sterkara lið og það voru meiri gæði í þeirra leik þegar á reyndi, bæði í færasköpun og nýtingu.
Bestu leikmenn
1. Benedikt Warén
Mark, stoðsending, skot í stöng og skot í slá. Hann var stórhættulegur í dag og bar af í sóknarleik Vestra.
2. Brenton Muhammad
Erfiðar aðstæður fyrir markmann, blautt, gríðarlega hvasst og auðvelt að gera mistök. Hann gerði ekkert af þeim og varði vel þegar á þurfti að halda.
Atvikið
Fyrsta markið. Ekki mikið að gerast fram að því og það var augljóst að fyrsta markið myndi skipta miklu máli. Chechu Meneses, sem var góður í vörn Vestra í dag skoraði það rétt fyrir hlé. Mikilvægt fyrir heimamenn sem voru á móti stífum vindi í síðari hálfleik.
Hvað þýða úrslitin?
Vestri á ágætis möguleika á að enda í þriðja sæti sem yrði afar fínn árangur, en Þór á enn tölfræðilegan möguleika á að falla þó það sé enn afar ólíklegt.
Vondur dagur
Sóknarlína Þórs. Það voru möguleikar í þessum leik og færi sem mér fannst þeir eiga að gera betur. Þetta er sjöundi deildarleikurinn í röð sem Þór skorar ekki og virðast þeir ekki hafa mikið sjálfstraust fyrir framan markið.
Dómarinn - 8
Fannst hann hafa góða stjórn á þessum leik. Ekki mörg stór atvik en oft þegar þessi lið mætast hefur leikurinn hlaupið upp en það gerðist ekki í dag að neinu ráði. Afar ódýrt gult spjald á Pétur Bjarnason er að endingu rándýrt því hann verður í banni í næsta deildarleik.


