SKÝRSLAN: Dimmur dagur í Árbænum þegar Þór/KA kom í heimsókn
Hvað réði úrslitum?
Það má alveg segja að það sem réði úrslitum í dag hafi verið markvarslan, Harpa markvörður Þórs/KA kom í veg fyrir að heimaliðið skoraði fleiri mörk en þetta eina.
Bestu leikmenn
1. Harpa Jóhannsdóttir (Þór/KA)
Harpa átti stórleik í markinu hjá Þór/KA í dag og varði hvað eftir annað, með mikið sjálfstraust í teignum og lét það ekkert stressa sig upp þó Fylkiskonur reyndu að ógna markinu hennar.
2. Shaina Faiena Ashouri (Þór/KA)
Átti lykilsendingu í fyrra marki Þórs/KA og skoraði það seinna.
Atvikið
Þegar Gunnar Oddur dómari flautaði til leiksloka varð Fylkisfólki ljóst að liðið er fallið. Augljós sorg kom strax fram hjá leikmönnum og þjálfarateymi enda vont hlutskipti sem féll þeim í skaut.
Hvað þýða úrslitin?
Fylkir er fallið í Lengjudeildina og ekki bara það heldur eru þær komnar í botnsæti deildarinnnar eftir að Tindastóll vann sinn leik í dag. Þór/KA siglir lygnan sjó um miðja deild.
Vondur dagur
Það var dapurt að horfa yfir Fylkisvöll þegar dómarinn flautaði til leiksloka í kvöld og ljóst var að Fylkir var fallið úr Pepsi Max-deildinni . Það er margt magnað við þetta félagið en þó fyrst og fremst fólkið sem myndar það. Félagið á líka einn glæsilegasta völl landsins, og þann völl sem skemmtilegast er að koma á. Það er dimmt yfir í Árbænum en hætt er við því að karlalið félagsins fari sömu leið síðar í mánuðinum.
Dómarinn - 7
Eins og Arna Sif fyrirliði Þórs/KA benti mér á í viðtali eftir leikinn var skrítið að skilja æsinginn í Gunnari Oddi í upphafi leiks, hann ætlaði sér svo að sýna hver hefði valdið. Hann gaf Margréti Árnadóttur tiltal á 4. mínútu leiksins og mínútan náði ekki að klárast þegar hann hafði spjaldað hana fyrir brot. Annars var þetta heilt yfir fínt hjá honum, Arna Sif taldi að hún hafi ekki átt gula spjaldið skilið, en ég heyrði líka aðra tala um að hún hafi átt að fá rautt. Ég get ekki dæmt um það enda sá ég það illa.



