Liðin skipta stigunum milli sín.

Komið að uppbótartíma.

Frábærlega varið!!!

Villar með flottan skalla sem Ólafur ver virkilega vel. Kórdrengir nálægt því að ná forystunni á ný.

Fylkismenn vildu víti en ekkert dæmt.

Fylkismennirnir mun betri eftir tvöföldu skiptinguna í hálfleik. Varamennirnir komið sterkir inn.

Orri Sveinn skallar framhjá úr dauðafæri! Einhverjir Fylkismenn í stúkunni voru byrjaðir að fagna!

Fatai fær mjög fínt færi en hittir ekki markið.

Þórður Gunnar með skot fyrir utan teig en Daði ekki í vandræðum með að verja.

Það er meira að gerast fram á við hjá Fylki núna eftir hlé.

Benedikt með stórhættulegan bolta inn í teig en Fylkismenn ná ekki að koma honum á markið.

Árbæingar í stúkunni orðnir pirraðir út í dómgæsluna.

Seinni hálfleikur hafinn.

Kórdrengir beittari og gefa fá færi á sér. Fylki gengið illa að skapa.

Ólafur handsamar fyrirgjöfina eftir hornið.

Kórdrengir fá horn. Fylkismenn ósáttir við að fá ekki aukaspyrnu.

Arnleifur með fyrirgjöf sem Þórir skallar framhjá. Kórdrengir að fá betri færi en leikurinn alveg stál í stál.

Hákon Ingi með skot af löngu færi en yfir girðingu. Tapaður bolti.

Kristján Atli brýtur á Laursen. Stuðningsmenn Fylkis kalla eftir spjaldi en Kristján sleppur með tiltal.

Þórir Rafn flaggaður rangstæður.

Unnar Steinn með skot af löngu færi en hittir ekki á markið

Daði Ólafsson með hornspyrnu swem lendir ofan á þversláni.

Þórir Rafn Kórdrengur skallar naumlega framhjá eftir fyrirgjöf frá hægri. Flott tilraun.

Nikulás Val með sendingu inn á teig sem Daði handsamar.

Guðmann skallar á markið eftir horn en Ólafur markvörður Fylkis vel staðsettur og skallinn beint á hann.

Afskaplega róleg byrjun á leiknum.

Þórður með stungusendingu en Daði í marki heimamanna vel á verði, mætir úr teignum og hirðir þennan bolta.

Kórdrengir hófu leik og sækja í átt að Kringlunni í fyrri hálfleik. Fylkismenn hvítklæddir í dag, í varatreyjum sínum.

Fylkismaðurinn Albert Brynjar Ingason, fyrrum leikmaður Kórdrengja, mættur meðal áhorfenda. Byrjar á því að heilsa mönnum Kórdrengjamegin í stúkunni áður en hann færir sig Fylkismegin. Ákvað að velja leikinn framyfir FM 95Blö tónleikana.

Þrjár breytingar á Fylkisliðinu frá fyrstu umferð.

Inn koma Unnar Steinn Ingvarsson, Arnór Gauti Jónsson og Þórður Gunnar Hafþórsson. Út fara Benedikt Daríus Garðarsson, Frosti Brynjólfsson og Ásgeir Börkur Ásgeirsson.

Byrjunarliðin eru komin inn. Kórdrengir gera þrjár breytingar frá síðasta leik.

Daði Freyr kemur í markið í staðinn fyrir Óskar sem er settur á bekkinn. Þá koma Hákon Ingi Einarsson og Kristján Atli Marteinsson inn fyrir Kristófer Reyes og Daða Bergsson. Daði meiddist illa ó Kórnum.

"Fylkir er búið að vera lengi í efstu deild, mörg mörg ár. Síðustu 7-8 ár höfum við farið niður en beint aftur upp. Lið eins og Fylkir á að vera í efstu deild en það er ekkert sjálfgefið, þú þarft að vinna fyrir því heldur betur. Þú finnur fyrir því núna, lið sem er nýkomið upp, þetta er bara hörku leikur. Þetta verður barátta, stöðubarátta úti á vellinum og við eigum eftir að mæta þannig liðum í sumar og hver einasti leikur verður erfiður," sagði Rúnar Páll Sigmundsson, þjálfari Fylkis, í viðtali við Fótbolta.net eftir 3-1 sigurleikinn gegn KV í Lautinni í fyrstu umferð.

Leikurinn í kvöld er spilaður í Safamýri en sá völlur er aftur orðinn heimavöllur Kórdrengja eftir að liðið spilaði á gervigrasvelli Leiknis í Breiðholti í fyrra.

"Það er mjög gott að vera komnir til baka í Safamýrina en við áttum gríðarlega gott samstarf með Leiknismönnum og vorum mjög sáttir þar. Öll samskipti við Leiknismenn voru upp á tíu og þeir eiga allt hrós skilið frá okkur," sagði Davíð Smári Lamude, þjálfari Kórdrengja, við Fótbolta.net á dögunum.



Davíð verður sjálfur í stúkunni í dag en hann afplánar annan leik sinn af þremur í leikbanni. Aðstoðarmaður hans, Heiðar Helguson, stýrir Kórdrengjum frá hliðarlínunni.

FH hefur lánað markvörðinn Daða Frey Arnarsson í Kórdrengi. Daði er kominn með leikheimild og gæti spilað með Kórdrengjum þegar liðið mætir Fylki. Daði er 23 ára gamall og lék á sínum tíma fimmtán landsleiki fyrir yngri landsliðin.

Hann varði mark FH í fimmtán leikjum sumarið 2019 og í fyrra var hann á láni hjá Þór í Lengjudeildinni.

Í febrúar á þessu ári var Daði sendur í leyfi frá FH vegna ásakana í hans garð um að áreita ungar konur.

Dómari kvöldsins er Arnar Þór Stefánsson. Aðstoðardómarar eru Kristján Már Ólafs og Magnús Garðarsson. Eftirlitsmaður KSÍ er Einar Örn Daníelsson.

Lengjudeildarleikur af dýrari gerðinni!

Kórdrengir spila sinn fyrsta heimaleik í Lengjudeildinni í kvöld þegar liðið fær Fylki í heimsókn. Búast má við stórskemmtilegum leik tveggja liða sem spáð er toppbaráttu í deildinni.

Fylkir vann 3-1 heimasigur gegn KV í fyrstu umferð en liðinu er spáð sigri í deildinni. Kórdrengjum er spáð þriðja sæti en þeir töpuðu 1-0 gegn Þór fyrir norðan í síðustu umferð.


Úr leik Fylkis og KV í fyrstu umferð.