SKÝRSLAN: Annað bikarævintýri framundan í Breiðholti?
Hvað réði úrslitum?
Færanýting er einfalt svar. Dauðafæri sem fóru forgörðum í fyrri hálfleik munu eflaust sækja á einhverja Grindvikinga í nótt en ef þú nýtir ekki færin þín þá vinnur þú ekki fótboltaleiki. Það má alltaf rífast um sanngirni úrslita og hvort þetta eða hitt hafi verið sanngjarnt en þegar öllu er á botninn hvolft vinnur það lið sem nýtir fleiri færi hvort þau koma úr 2 skotum eða 100.
Bestu leikmenn
1. Bergvin Fannar Helgason
Vinnusemi upp á 10 og lét varnarlínu Grindavíkur aldrei í friði þann tíma sem hann spilaði. Skoraði gott mark og hefði að ósekju líklega átt að gera allavega eitt í viðbót.
2. Már Viðarsson
Það er að reynast mér erfitt að velja leikmann í þennan reit úr liði ÍR þar sem leikmenn liðsins sýndu allir jafna og góða frammistöðu í leiknum. Það sem Már hefur framyfir aðra þegar kemur að þessu vali er bandið um handlegginn sem fyrirliði og ábyrgðin sem því fylgir.
Atvikið
Fyrir mér er það atburðarrásin eftir rauða spjaldið á Thiago. Hann sparkaði vatnsbrúsum við bekk Grindavíkur í burtu Alfreð þjálfara til lítillar gleði. Alfreð rauk upp og reif hann til sín og lét hann heyra það fyrir þessa hegðun og var alls ekki sáttur. Knattspyrna er leikur tilfinninga og það sást svo sannarlega þarna.
Hvað þýða úrslitin?
Bikarkeppnin er alls ekkert flókin. ÍR er i 16 liða úrslitum og getur hlakkað til þess. Grindavík getur einbeitt sér alfarið að Lengjudeildinni.
Vondur dagur
Kristófer Páll Viðarsson fékk tvö úrvalsfæri í fyrri hálfleik sem hann átti að skora úr. Að sama skapi verður Thiago Dylan Ceijas að vera hér líka fyrir það að fá rautt spjald annann leikinn í röð.
Dómarinn - 8
Mér fannst leikurinn vel dæmdur heilt yfir hjá Arnari, Rauða spjaldið var borðleggjandi frá mér séð og réttur dómur. Við getum alveg tínt til einhverja dóma sem hefðu kannski getað fallið í aðra átt eftir 50-50 einvígi en heilt yfir flottur leikur hjá tríóinu.