SKÝRSLAN: Daníel bjargaði stigi fyrir KA í fyrsta heimaleiknum á nýja vellinum
Hvað réði úrslitum?
Það hlaut bara að koma að því að KA myndi jafna metin! Fram var tveimur mörkum yfir eftir tvö glæsileg mörk í fyrri hálfleik en KA menn óðu í færum í síðari hálfleik. Ólafur Íshólm varði oft á tíðum mjög vel en KA menn fóru einnig illa með góð færi.
Bestu leikmenn
1. Sveinn Margeir Hauksson
Frábær í liði KA í kvöld. Lagði upp jöfnunarmarkið með glæsibrag og hefði getað búið til enn fleiri mörk.
2. Fred Saraiva
Átti frábæran fyrri hálfleik sérstaklega en eins og hjá flestum Framurum fór að draga af honum í þeim síðari.
Atvikið
Ólafur Íshólm átti fínan dag í marki Fram en hann gerðist sekur um að brjóta á Ásgeiri Sigurgeirssyni og víti dæmt. Hallgrímur Mar skoraði og kom KA mönnum inn í leikinn.
Hvað þýða úrslitin?
KA er áfram í 4. sæti og er stigi á eftir Stjörnunni sem gerði jafntefli við Keflavík í kvöld. Fram er stigi á eftir Keflavík í 9. sæti.
Vondur dagur
KA menn eru klárlega vonsviknir með að fara ekki með öll stigin úr þessum leik! Ótrúlegur fjöldi færa sem fóru forgörðum hér í kvöld. Að sama skapi virtustu Framarar vera með þetta í teskeið en það fór allt í skrúfuna undir lokin.
Dómarinn - 5
Þetta var frekar furðulega dæmdur leikur að mínu mati. Línan vægast sagt óskýr. Það voru nokkrar harkalegar tæklingar fannst mér og alveg appelsínugul spjöld að minnasta kosti.