SKÝRSLAN: Fylkismenn tylltu sér á toppinn með stórsigri
Hvað réði úrslitum?
Fylkir kláraði sín færi annað en Þórsarar, sem heilt yfir voru sterkari stóran kafla leiksins, einnig verður að benda á vafaatriði sem féllu Fylkismönnum í vil sem líklega hafði áhrif á úrslitin.
Bestu leikmenn
1. Benedikt Daríus Garðarsson (Fylkir)
Lang hættulegasti maður vallarins, kom sér í hvert færið á fætur öðru og lét aldeilis hafa fyrir sér, óheppinn að skora ekki fleiri mörk en þetta eina úr vítinu.
2. Birkir Eyþórsson (Fylkir)
Birkir var virkilega öflugur á miðju Fylkismanna í dag, fiskaði vítaspyrnu og bjó til slatta af færum fyrir samherjana.
Atvikið
Vítið sem Þórsarar vildu á 79 mínútu í stöðunni 1-0, ég gat ekki betur séð en að Ion hafi verið kippt niður aftanfrá á leið sinni inn á teiginn og þar með átt að fá vítaspyrnu, en í staðinn brunuðu Fylkismenn upp og skoruðu sitt annað mark.
Hvað þýða úrslitin?
Fylkir hirðir toppsæti deildarinnar af Selfossi sem hafði verið þar í um tvær klukkustundir, Þórsarar eru enn að berjast í neðri hlutanum.
Vondur dagur
Aron Birkir fær á sig tvær vítaspyrnur og fjögur mörk, það er ekki til útflutnings en hann var þó ekki alslæmur í leiknum, ver fyrra vítið og grípur vel inní oft á köflum, erfitt þó að setja þetta á einhvern annan, því miður.
Dómarinn - 2
Einar hefur átt marga betri leiki og ég held að hann verði sammála mér þegar hann skoðar stóru atriðin aftur, hann hefði getað rekið Elvar Baldvins útaf í fyrri hálfleik, hann hefði klárlega átt að dæma víti fyrir Þór í stöðunni 1-0 og svo er ég aðeins efins með fyrra vítið sem Fylkir fær, fannst Birkir láta sig detta þegar hann sér að hann er að missa boltann, en mögulega rétt þó.