SKÝRSLAN: Valskonur bikarmeistarar í fjórtánda sinn!
Hvað réði úrslitum?
Valskonur voru samkvæmar sjálfum sér og spiluðu sinn leik. Þó misvel á milli hálfleikja. Þær héldu vel í boltann, keyrðu upp kantana og dældu boltum inná teig. Færanýtingin var ekki góð hjá þeim í fyrri hálfleik, ólíkt hjá Blikum sem komust nokkuð óvænt yfir eftir laglega sókn. Í síðari hálfleik tókst Valskonum að þétta tökin inná miðsvæðinu og leikmaður eins og Ásdís Karen naut sín í botn. Blikar komust lítt áleiðis fram völlinn og voru þá helst að reyna langa bolta fram sem miðverðir Vals áttu ekki í vandræðum með. Stöðugleikinn og reynslan í Valsliðinu fór langt með sigurinn í dag.
Bestu leikmenn
1. Þórdís Hrönn Sigfúsdóttir
Er búin að vaxa mikið með Valsliðinu í sumar og átti geggjaðan leik í dag. Hún var gríðarlega vinnusöm og ógnandi. Lagði upp bæði mörk Vals.
2. Ásdís Karen Halldórsdóttir
Ásdís átti virkilega góðan leik fremst á miðjunni hjá Val. Sérstaklega í síðari hálfleik þar sem hún lék á als oddi. Var mjög skapandi og skoraði sigurmarkið eftir sókn sem hún hóf með góðri pressu.
Atvikið
Það koma tvö atvik upp í hugann. Í fyrsta lagi sigurmark leiksins sem að Ásdís Karen skoraði. Ásdís vann boltann með góðri pressu. Kom honum áfram á liðsfélaga og kláraði hlaupið sitt inná teig þar sem hún tók við geggjaðri sendingu frá Þórdísi Hrönn og skoraði örugglega. Annað rosalegt atvik var stjörnumarkvarsla Söndru Sigurðardóttur þegar rúmar 10 mínútur lifðu leiks. Anna Petryk tók þá frábæra aukaspyrnu fyrir Breiðablik sem Sandra varði á ótrúlegan hátt og hélt þannig forystu Vals.
Hvað þýða úrslitin?
VALUR ER BIKARMEISTARI 2022! Valsarar voru síðast bikarmeistarar 2011 og þetta er fjórtándi bikarmeistaratitill liðsins. Fyrir leik höfðu Valur og Breiðablik unnið 13 bikarmeistaratitla hvort og Valskonur eru því orðnar sigursælasta lið bikarkeppni kvenna. Valskonur hafa verið frábærar í sumar og eru á toppi Bestu-deildarinnar. Liðið á því möguleika á að vinna tvöfalt.
Vondur dagur
Heiðdís Lillýardóttir er nýkomin til baka í lið Breiðabliks eftir meiðsli og gerði vel lengst af í leiknum. Hún gerði sig hinsvegar seka um slæm mistök í aðdranga sigurmarksins þar sem hún tapaði boltanum illa.
Dómarinn - 8,5
Mjög góð frammistaða hjá Einari Inga og hans aðstoðardómurum.