SKÝRSLAN: Bitlausir Selfyssingar töpuðu á Seltjarnarnesi
Hvað réði úrslitum?
Óheppilegt sjálfsmark hjá Adrian Sanchez réði úrslitum. Gróttumenn voru þó sterkari og verðskulduðu sigurinn.
Bestu leikmenn
1. Aron Bjarki Jósepsson
Steig varla feilskref í leiknum. Frábær frammistaða hjá Aroni sem var duglegur að fara upp úr varnarlínunni til að spila sem djúpur miðjumaður með boltann og í hápressu án boltans.
2. Arnar Þór Helgason
Var frábær í vörn Gróttu þar sem sóknarleikmenn Selfoss sáu vart til sólar. Átti stóran þátt í eina marki leiksins og var óheppinn að skora það ekki sjálfur.
---
Grímur Ingi Jakobsson var meðal líflegustu leikmanna Gróttu og þá áttu Gabríel Hrannar Eyjólfsson og Tareq Shihab einnig flottan leik.
Atvikið
Opnunarmarkið. Rangstöðulykt í aðdragandanum, þar sem leikmaður Gróttu virtist vera innfyrir varnarlínuna þegar spyrnan fór af stað, til að hindra hlaup varnarmanna Selfoss.
Hvað þýða úrslitin?
Grótta fer upp í 13 stig og getur reynt að blanda sér í toppbaráttuna með sigrum í næstu umferðum.
Selfoss er áfram með 10 stig, fimm stigum fyrir ofan Leikni R. í fallsæti sem á leik til góða.
Vondur dagur
Þór Llorens Þórðarson fékk tvö gul spjöld og hjálpaði það ekki Selfyssingum á lokakaflanum. Fyrra gula spjaldið varð að aukaspyrnu sem leiddi eina mark leiksins af sér.
Þór verður í leikbanni í næsta leik, sem er afar mikilvægur heimaleikur gegn Leikni R.
Dómarinn - 7
Vel dæmt heilt yfir. Tvö erfið vafaatriði sem er hægt að deila um, en engin auðsjáanleg mistök.