The Big Glacier er MÆTTUR 15 mínútur í leik og alla leið frá austfjörðum er Hilmar Jökull mættur í bæinn með stuðningsmannasveitina sína Kópacabana. Það styttist í þennan rosalega leik!!

Tvær breytingar á byrjunarliði Breiðabliks - Leitað í reynslu Andra Búið er að opinbera byrjunarliðin og gerir Óskar Hrafn Þorvaldsson, þjálfari Breiðabliks, tvær breytingar á sínu liði frá fyrri leiknum. Kristinn Steindórsson er með rifinn liðþófa og inn í liðið kemur Viktor Karl Einarsson. Þá kemur Andri Rafn Yeoman inn fyrir Davíð Ingvarfsson.

Frá deildarleiknum gegn Víkingi eru átta breytingar. Einungis Anton Logi Lúðvíksson, Andri Rafn og Viktor Karl eru áfram í byrjunarliðinu. Í líklegu byrjunarliði Fótbolta.net var Davíð í stað Andra en Óskar Hrafn ætlar að leita í reynslu Andra í dag.

Andri spilar í dag sinn 32. Evrópuleik fyrir Breiðablik. Þetta er elleftir leikurinn í Sambandsdeildinni, hann á að baki fjórtán leiki í Evrópudeildinni og sjö í forkeppni Meistaradeildarinnar. Fyrsti Evrópuleikurinn kom árið 2010.

Stórar fjárhæðir í húfi Ef Breiðabliki tekst að komast í riðlakeppnina er félagið öruggt með rúmlega 3,4 milljónir evra frá UEFA eða rúmlega 492 milljónir íslenskra króna. Þetta er samanlögð upphæð með því sem Breiðablik hefur þegar tryggt sér. Upphæðin hækkar svo með góðum úrslitum í riðlinum sjálfum.

Dómarar úr þýsku Bundesligunni Þjóðverjar sjá um dómgæsluna og það er VAR á Kópavogsvelli í dag. Aðaldómarinn heitir Daniel Schlager, er 33 ára, og dæmir í Bundesligunni. Hann starfaði fyrr í sumar á Íslandi en hann var fjórði dómari í teyminu sem dæmdi landsleikinn gegn Portúgal á Laugardalsvelli.

Ekki allir með sama hugarfar Fer maður varkárari inn í svona leik, heldur en aðra leiki, þar sem mjög mikið er í húfi?

„Við gerum það ekki, ég held það þýði ekkert. Það eina sem það gerir er að draga þig niður, þá ferðu að hugsa of mikið um hvað sé undir og hvað gerist ef þetta gengur ekki. Ég get ekki sagt að allir leikmenn komi með nákvæmlega sama hugarfari í leikinn, menn eru misjafnir eins og þeir eru margir, sumir verða varkárari við þessar aðstæður heldur en aðrir. En í grunninn verður nálgunin að vera sú að við séum að fara keyra á þá; þurfum að stíga hátt á þá, þurfum að vera grimmir, megum ekki dúlla okkur með boltann. Við þurfum orku og ég held að það verði enginn þreyttur á morgun; menn geti hlaupið úr sér lungun í 90 mínútur," segir Óskar Hrafn.

Þurfa að passa sig á Ibraimi leikmanni Struga Besart Ibraimi var virkilega öflugur í sókn Struga í fyrri leiknum. Það er hættulegasti leikmaður gestaliðsins

„Mér fannst Ibraimi framherjinn vera helvíti góður, einhvers konar Suarez-týpa, er með gott jafnvægi og er í rauninni að nota þig til þess að fleyta sér áfram. Hann er klókur, með góðar staðsetningar. Svo eru teknískir miðjumenn í liðinu, snöggir að fara fram á við í skyndisóknum," segir Höskuldur.

Lykilmaðurinn Marjan Radeski sem var í banni hjá Struga í fyrri leiknum fékk tveggja leikja bann og verður því einnig í banni í dag.

Höskuldur vill alvöru stuðning - Uppselt er á leikinn „Við þurfum að finna gott jafnvægi á milli þess að vera við sjálfir og fara inn í leikinn til að vinna hann, á sama tíma þurfum við að vera með góða áhættustýringu þar sem þetta lið er geysilega gott í skyndisóknum. Við megum helst ekki bjóða þeim upp í þann dans. Við viljum hafa stjórn og spila leikinn á okkar forsendum," segir fyrirliði Breiðabliks en það er löngu uppselt á leikinn.

„Það gerir það vissulega, við erum með forystu, en þess vegna er enn mikilvægara að fara ekki í leikinn og fara verja þessa forystu. Við þurfum að fara í leikinn til þess að vinna hann í bland við góða áhættustýringu. Það er þessi millivegur sem við þurfum að feta."

„Ég býst ekki við neinu öðru en það verði pakkfull stúka. Ég vil hvetja Kópavogsbúa og alla sem mæta til að styðja við bakið á okkur. Það munar svo sannarlega; gefur okkur aukna orku."

Sjáðu viðtalið við Höskuld í heild sinni:
Fiðrildin farin að flögra í Höskuldi - „Eðlishvötin tók yfir"

Þetta hafði Serbinn, Damir Muminovic að segja í undirbúningi fyrir leikinn „Ég vona að sem flestir mæti, sama hvort það séu Blikar eða einhverjir aðrir. Ég býst við mikilli stemningu."

„Ég held það breyti engu að vera með forystuna, held við fáum betra veður núna og það komi í ljós að hitt liðið sé bara fínt líka."

Hversu stór er þessi leikur?
„Virkilega stór, stærsti leikur sem ég hef held ég spilað á ferlinum allavega. Það er mikið undir, mikið í húfi, bæði fyrir klúbbinn og okkur. Þetta er bara risastórt. Við viljum fara áfram, skrifa söguna fyrir klúbbinn og okkur sjálfa líka."

Viðtalið við Damir í heild sinni:
Damir: Viljum skrifa söguna fyrir klúbbinn og okkur sjálfa

Besta vörn Blika er að vera með boltann Vallaraðstæður í fyrri leiknum voru ekki frábærar og vildi Óskar að sínir leikmenn pössuðu sig í ákvarðanatökur. Er öðruvísi áhættustýring á gervigrasinu á Kópavogsvelli?

„Ég vona að við náum betra flæði á boltann en við náðum í Makedóníu, þar náðum við engu flæði. Ástæðurnar voru margar og ólíkar. Ég á von á því að þetta verði öðruvísi leikur, á von á því að sjá meiri gæði; betra spil og hærra tempó. Við þurfum að sjá til að við séum yfir þar. Áhættustýringin þarf að vera góð, Struga eru sterkir ef þeir geta unnið boltann hratt, þeir eru mjög góðir að vinna boltann í ákveðnum aðstæðum. Við þurfum að passa að spila ekki upp í hendurnar á þeim, þurfum að velja rétt. Besta vörnin okkar er að vera með boltann, ef við tökum góðar ákvarðanir með boltann þá erum við í góðum málum. Annars getum við lent í miklum vandræðum," sagði Óskar Hrafn Þorvaldsson í viðtali við Fótbolti.net í gær.

Sjáðu viðtalið við Óskar í heild sinni:
Óskar Hrafn: Það eina sem það gerir er að draga þig niður

Enn eitt Evrópukvöldið í Kópavogi Heilir og sælir kæru lesendur og verið hjartanlega velkomnir í þráðbeina textalýsingu hér frá Kópavogsvelli þar sem að Blikar eru einu jafntefli/sigri frá því að komast í riðlakeppni Sambandsdeildarinnar.

Blikar unnu 1-0 útisigur í fyrri leiknum gegn Struga frá Norður-Makedóníu. Höskuldur Gunnlaugsson skoraði eina markið.