SKÝRSLAN: Bræður börðust þegar Valur vann HK sannfærandi
Hvað réði úrslitum?
Valur er bara mikið betur mannað lið, komust snemma yfir og mér fannst þeir alltaf hafa tök á leiknum þó HK hafi stundum reynt að gera sig líklega. Sigurinn hefði vel geta verið stærri en 4-1.
Bestu leikmenn
1. Patrick Pedersen, Valur
Skoraði geggjað mark og lagði upp annað. Var stöðugt að leita uppi liðsfélagana og ljóst að stoðsendingar hefðu getað verið fleiri.
2. Birkir Már Sævarsson, Valur
Það er erfitt að átta sig á hvernig maður sem verður fertugur í nóvember geti haldið gæðunum svona svakalega vel. Afgreiddi markið sitt eins og besti framherji og lagði svo upp annað. Geggjaður gæi.
Atvikið
Stóra augnablikið í leiknum var í lokin þegar þeir voru orðnir þrír bræðurnir að reyna að hafa áhrif á úrslit leiksins. Ómar Ingi Guðmundsson þjálfari HK sá Val setja bróður sinn, Orra Sigurð Ómarsson, inná á 55. mínútu og þurfti þarna að vonast til að honum gengi illa. Bróðirinn sem hann þjálfaði upp alla yngri flokka og hefur fylgt vel eftir. Hann trompaði Valsmenn svo þegar hann setti yngsta bróðurinn inná hjá HK, Ísak Aron Ómarsson.
Hvað þýða úrslitin?
Stóra þýðingin með þessum úrslitum í dag að Víkingur náði ekki að gulltryggja sér Íslandsmeistaratitilinn. Til þess hefði Valur ekki mátt vinna. Að öðru leiti endar Valur 22 leikja mótið bara í sama öðru sætinu og þeir hafa átt mest allt mótið og HK endar í neðri hlutanum nú þegar deildinni verður skipt upp.
Vondur dagur
Á fullkomnum degi, þegar allir eru heilir er HK með gott fótboltalið, breiddin er hinsvegar þeirra stóra vandamál. Í dag eru þeir með fyrirliðann og varafyrirliðann á meiðslalista, Leif Andra Leifsson og Birki Val Jónsson og þar með er hálf vörnin dekkuð með mjög ungum og efnilegum mönnum í þeirra stað. Að missa svo sóknarmanninn markheppna Anton Søjberg í veikindi gerir hlutina svo enn verri. Skortur á breidd gæðaleikmanna er það versta við HK liðið.
Dómarinn - 8
Toppleikur hjá Pétri og teyminu hans og eflaust ekkert erfiður að dæma. Lyfti einu spjaldi og það réttilega og hafði góð tök á þessu.