SKÝRSLAN: 90 manns sáu tvö mörk Katrínar halda Breiðablik á toppnum
Hvað réði úrslitum?
Breiðablik er með betra lið á pappírnum heldur en Keflavík og þær sýndu það í kvöld. Ekkert voðalega lengi eða mikið en nóg þó. Voru mun meira með boltann og sköpuðu sér heilt yfir fleiri og hættulegri færi og skoruðu tvö góð mörk. Meira þurfti ekki frá þeim í kvöld og þar við sat.
Bestu leikmenn
1. Katrín Ásbjörnsdóttir
Í sínum fyrsta byrjunarliðsleik í deildinni þetta sumarið og skorar tvö. Eins og sönnum framherja sæmir var hún á réttum stað á réttum tíma í tvígang og var verðlaunuð fyrir. Virðist henta henni ágætlega að spila gegn Keflavík því hún skoraði einnig tvívegis er liðin mættust í bikarnum á dögunum.
2. Barbára Sól Gísladóttir
Mikið í boltanum í fyrri hálfleik og átti oft góðar rispur, Fór minna fyrir henni í síðari hálfleik eins og reyndar mörgum öðrum.
Atvikið
Opnunarmarkið hennar Katrínar. Breiðablik hefur gengið illa síðustu tímabil er liðið hefur mætt á grasið í Keflavík. Á því varð þó breyting í kvöld og þrjú stig sigla heim í Smárann.
Hvað þýða úrslitin?
Breiðablik heldur í toppsætið og bætir einu marki í plús við á lið Vals. En bæði lið eru með 27 stig en Breiðablik ofar á markatölu. Keflavík áfram í áttunda sæti deildarinnar með sex stig.
Vondur dagur
Það er EM í gangi sem vissulega útskýrir eflaust eitthvað en að aðeins 90 manns séu mætt á leik í efstu deild kvenna á Íslandi og hvað þá þegar toppliðið er annað liðið er hreinlega skammarlegt. Hvað sem það kann að vera sem veldur þá hljótum við að geta gert betur en það. Félögin sjálf, KSÍ og ÍTF hljóta að geta tekið höndum saman um að markaðssetja deildina betur og gert henni hærra undir höfði með það að markmiði að auka áhuga og aðsókn á leiki. Eflaust ýmislegt verið reynt en það virðist ekki vera að virka neitt sérstaklega vel.
Dómarinn - 8
Fínasti leikur hjá Twana að mínu mati. Eftir mjög rólegan fyrri hálfleik á flautunni fékk hann örlítið meira að gera í þeim síðari sem hann leysti vel með teymi sínu.