SKÝRSLAN: Sanngjarn en ljótur sigur
Hvað réði úrslitum?
Valskonur áttu ekkert meira skilið en að vinna leikinn í dag og áttu að vinna hann miklu stærra. En eftir að hafa verið miklu betri allan seinni hálfleikinn leit allt út fyrir það að Keflvíkingar væru að fara að taka stig af Íslandsmeisturunum en allt kom fyrir ekki þar sem sigurmarkið kom á 90. mínútu en það var sjálfsmark. Það er eiginlega ekki hægt að tapa á verri og ljótari hátt en eins og ég segi að þá áttu Valskonur ekkert meira skilið.
Bestu leikmenn
1. Fanndís Friðriksdóttir
Var að matreiða sóknarmenn Vals hægri vinstri og það er með hreinum ólíkindum að hún sé ekki með fjórar stoðsendingar eftir leikinn. Þrjú dauðafæri á 7 mínútna kafla hjá Val sem fara forgörðum en hún Fanndís lagði þessi færi öll upp. Svo má ekki gleyma þessum eitruðu hornspyrnum hennar en þannig kom einmitt jöfnunarmarkið í dag.
2. Vera Varis
Það er kannski ótrúlega skrítið að segja það en þrátt fyrir að hún tapaði var hún besti leikmaður Keflavíkur í dag. Það var nákvæmlega ekkert sem hún gat gert í mörkunum en ég er ekkert eðlilega spenntur að sjá XG-ið úr þessum leik. Þá munum við sjá hversu góð hún var. Varði líka sérstaklega einu ekkert smá vel þegar það var rúmlega korter eftir af leiknum.
Atvikið
Það er ekki hægt að velja neitt annað en atvikið sem ræður úrslitunum hér í dag. Sjálfsmark á 90. mínútu frá Anitu gerir það að verkum að Keflvíkingar fara með 0 stig í staðin fyrir 1 heim í Keflavík. Ótrúlega klaufalegt sjálfsmark.
Hvað þýða úrslitin?
Valskonur halda áfram að elta Blika í þessari mögnuðu toppbaráttu en Keflvíkingar eru áfram í fallsæti.
Vondur dagur
Það bara verður að segja Anita Bergrán Eyjólfsdóttir þar sem hún skorar þetta sjálfsmark sem ræður úrslitunum. Hún var búinn að vera mjög fín í dag fyrir sjálfsmarkið. Það var engin pressa á henni og nægur tími en hún ætlar að teygja sig í boltann sem endar með því að hún potar boltanum í netið.
Dómarinn - 9
Engin vafaatriði, hafði góð tök á leiknum og flæðið var gott líka. Bara mjög góður dagur hjá Arnari og teyminu að mínu mati.