SKÝRSLAN: Framarar seigir í sex stiga slag
Hvað réði úrslitum?
Fram skapaði sér bara mikið betri færi. Hefðu átt að vera yfir í hálfleik eftir að hafa fengið nokkur flott færi. Í staðinn fyrir að hengja haus eftir jöfnunarmarkið frá gestunum þá keyrðu þeir á þetta og sóttu að lokum sigurmarkið sem var ekkert minna en þeir áttu skilið.
Bestu leikmenn
1. Már Ægisson
Lang langbesti maður vallarsins. Var að halda varnarmönnum gestanna uppteknum allan leikinn og varnarmennirnir réðu í raun ekkert við hraðann í honum. Stoðsendingin hans á Djenairo Daniels var virkilega flott. Fram mun sakna hans mikið en hann er á leið í nám erlendis.
2. Djenairo Daniels
Sýndi það í dag að hann er hörkuleikmaður sem bætir Framliðið heilan helling. Varnarmenn Stjörnunnar réðu illa við hann og Árni Snær leit illa út þegar Djenairo át hann bara á nærstönginni í markinu.
Atvikið
Sigurmarkið. Framarar nýta sér algjöran sofandahátt í vörn gestanna. Fred sendir bara einfalda sendingu á Magnús sem var bara skyndilega aleinn. Stjörnumenn þurfa að hætta að fá á sig svona klaufaleg mörk.
Hvað þýða úrslitin?
Liðin voru jöfn að stigum fyrir leik og nú eru Fram með 26 stig í fimmta sæti en Stjarnan með 23 stig í 7. sæti.
Vondur dagur
Eftir martraðaleikinn Í Eistlandi þar sem Stjarnan fékk á sig mjög klaufaleg mörk hlýtur að vera áhyggjuefni hversu einfalt sigurmark Fram var í kvöld. Liðið verður að vera vakandi í varnarleiknum.
Dómarinn - 9
Mjög vel dæmt hjá Helga. Fram var þrisvar með köll fyrir vítaspyrnu og í öll skiptin var hann með allt á hreinu og dæmdi ekkert.